بی این پی نا کریمہ بلوچ نا بابت انتظامیہ نا رویہ نا مذمت

کراچی(آن لائن) بلوچستان نیشنل پارٹی نا بنجائی بیان اسے ٹی شہید کریمہ بلوچ نا کراچی ٹی نماز جنازہ خواننگ اٹ اڑاند اتنگ و شہید انا میت ءِ گھنٹہ غاتیان پد اُرا والا تا دوٹی تننگ نا مذمت ءِ کرسا پارینے کہ حکمران تا دا کاریم بلوچ قوم نا غم و غصہ نا سوب مریک۔ آمر مشرف شہید نواب اکبر خان بگٹی و داکان مست انا حکمرانک شہید آتون ہرا رویہ ءِ تکار اینو ہم ہمو وڑ نا پالیسی تے دوام تننگ نا کوشست کننگ انگ ءِ۔ خوفزدہ حکومت نا دا کاریم آن پد شکبری نا ودنگ پین زیات مسنے۔ پارٹی نا کنڈآن پاننگانے کہ اگہ ہندا ہیت آتے تخنگا تو یقین اٹ بلوچستان نا حالیت آک پین خراب مریرہ بایدے دن مروسس کہ کراچی ٹی شہید انا نماز جنازہ خواننگ نا موکل تننگاکہ تانکہ اُلس شہید کریمہ بلوچ ہرا گم انگا بندغ آتا یلہ کرفنگ بلوچستان اٹ مشرف نا ظلم و بیدادی تا برکلاف توار چست کرسا کریکہ اونا نماز جنازہ خواننگ نا موکل تننگ اٹ ہرا قیامت بسکہ۔ بلوچ آتا جنازہ غاتے توننگ نا پولیسی مالو آمبار داسہ ہم برجا ءِ۔ ہرا انسانی حق انسانیت نا برخلاف ءُ گام گیج اسے۔ بلوچستان نا معاملہ غاتا ایسری نا جاگہ غا ناروا انگا پالیسیک و بیدادیک برجا ءُ، اصل حکمران طاقت نا کمک اٹ بلوچستان نا حالیت آتے ایسر کننگ کوارہ ہرا ممکن اف۔ پارٹی دا کاریم مذمت ءِ کیک قوم تے طاقت نا زور اٹ چٹفنگ ممکن اف داکان مست ہم آخس کہ آمر حکمران سول ڈکٹیٹر بسر اوفک ہراتم طاقت نا سہارا ءِ ہلکر حالیت آتا خرابی نا زمواریک ہندن ءُ پالیسی ءُ۔