اِرا تو اسکان سوغند ہرفپروک آ پارلیمنٹرین ڈی سیٹ کننگک

0

Get real time updates directly on you device, subscribe now.

اسلام آباد:  بنجائی حوالکاری وزیر و نشریات فواد چوہدری پارینے کہ ڈاکٹر محمد اشفاق ایف بی آر نا پوسکن آ چیئرمین تعینات کننگانے، اپوزیشن اووسیز پاکستانی تے وونٹ انا حق تننگ خواپک، دا اسہ سازش اسے نا رد اٹ کننگ انگ ءِ، کابینہ 60 دے اسکان سوغند ہرفپروک آ پارلیمنٹرین ءِ ڈی سیٹ کننگ نا منظوری ءِ تسنے۔ زرگزرانی وڑک سوگو مننگ اٹی ءُ، برآمد آتیٹی ودکی، کبینی ٹی کمتی بننگ اٹی ءِ، مینار پاکستان واقعہ نا بابت بڑزکو کہولی کمیٹی اس ٹہیفنگ انگ ءِ، اوغانستان اٹی حکومت جوڑ مننگ نا بابت پاکستان زموار ءُ کرد اس ادا کیک، بھارت یا پین کس ءِ اوغانستان اٹ حالیت آتے خراب کننگ نا موکل تننگ کپنہ۔ سَے شنبے نا دے وزیر اعظم نا کماشی ٹی بنجائی کابینہ نا دیوان آن پد میڈیا بریفنگ ترسا بنجائی حوالکاری وزیر فواد چوہدری پارے کہ ہزار آتا درملکی تے اوغانستان آن پاکستان کشانے، پی آئی اے 1500 بندغ ءِ اوغانستان آن پاکستان آ ایسن، پاکستان پیش تمنگ نا پراسس اٹی اہم ءُ کڑد اس ادا کننگ اٹی ءِ۔ اوغانستان اٹی حکومت جوڑ مننگ نا بابت پاکستان نا زموار ءُ کڑد اسے۔ نن اوغانستان نا اتھارٹی تتون رابطہ ٹی اُن، کابینہ ٹی دا ہیت آ زور شاغنگا کہ بھارت اوغانستان اٹ نیام تمپ، بھارت نا اوغانستان تون ہچ ءُ سیم اس ملپک، ولدا ہم او تدوک آ حکومت اٹی اوغان ڈغار ءِ پاکستان نا برخلاف کاریم اٹ ایس۔ بھارت نا کنڈ آن اوغانستان اٹی امن کن مروک کوشست آتے لتاڑ کننگ نا کوشست آک مونی بننگ اتی ءُ، وخت اس کہ پاکستان امن نا شریدار ءِ۔ ہندا سوب آن نن بھارت یا پین کس ءِ دا عمل ءِ لتاڑ کننگ کن الیپنہ۔ دا وار اوغان تے پاکستان آ بننگ کن الیپننگ اُن۔ اوغان تا بابت او جاگہ نا حکومت پالیسی جوڑ کرینے، و اوغان تے بشخنگ نا پڑو کننگانے۔ امنائی سوب یا دستاویز تون اوار پاکستان آ بروک آتے بخیر کننگک۔ کابینہ دیوان نا بابت حوال ترسا او پارے کہ ووٹ انا دا نظام ءِ بدل کننگ نا گرج ءِ، ولے نن ہُننگ اُن کہ کوشست مننگ اٹی ءِ کہ ہمو نود لکھ پاکستانی تے وونٹ انا حق رسینگپ، و ملک اٹی جوانی بف۔ کابینہ دا رویہ نا مذمت ءِ کرینے، پی ٹی آئی دھاندلی آ برانز نا بابت جوڈیشل کمیشن آ ہناسس، دا کمیشن نا کماشی ءِ مسکوہی چیف جسٹس کریسس، و او 36 سلاہ تسوسس۔ دا 36 سلاہ ٹی گیشتری دا رد اٹ ئسر کہ ہراتم ووٹ بٹنگ نا عمل چٹک تو اوکان پد حساب اسکان کل گڑاک خراب مریرہ۔ و ای وی ایم دا نیام اٹ مروک دھاندلی و ویل ءِ چٹفک۔ نن ہرا اصلاحات آتے کننگ اُن، دافتیٹی دا جوڈیشل کمیشن نا سلاہ تے بنداو جوڑ کننگانے، ونن اونا رد اٹ مونی گام کننگ خوانہ۔ نادرا ءِ پردیسی پاکستانی تے وونٹ تننگ کن زُو وڑ اس کننگ نا پارینن، اگہ پیشن ملک ساڑی شاری تا زرّراہی تس آک متوسہ تو ننا زرگزرانی پراگندہ مسکہ، ننا زرگزران لڑزاکہ، ولے نن اوفتے وونٹ انا ہم حق تفنہ، تو بھاز بھلو بے سہبی اسے۔ پاکستان مسلم لیگ (ن) و پاکستان پیپلزپارٹی (پی پی پی) دا ءِ تننگ خواپسہ، او پارے کہ کووڈ نا بابت حالیت آک جوان مننگ ئسر ولے خیبرپختونخوا و پنجاب نا ہسپتال آتیٹی کچ دوارہ 1500 مسنے و 70 درسد آکسیجن کاریم اٹ اتنگ انگ ءِ۔ کووڈ نا حالیت اسہ اِرا دے ٹی گچین متو تو ننے صنعت آتے گیس انا فراوانی ءِ کم کروئی تمک، کہ ناجوڑ آتے آکسیجن فراوان کننگ کین۔

(آن لائن)

Get real time updates directly on you device, subscribe now.

Leave A Reply

Your email address will not be published.