بلوچستان اٹ انٹرنیٹ آسراتی ءِ پک کننگے‘وزیر اعظم

اسلام آباد (اے پی پی) وزیراعظم عمران خان پارت کرینے کہ مر مر انگا و پدتموک آ علاقہ خاص کر بلوچستان، اوار مروک آ قبائلی علاقہ و سندھ انا مر مر انگا علاقہ غاتیٹی انٹرنیٹ نا آسراتی نا فراوانی و گچین کوریج ءِ پک کننگ آ خصوصی چکار کننگے۔ اوٹیلی کام سیکٹر اٹ حکومت نا کنڈآن پین آسودہی تننگ نا بابت سلاہکار خزانہ وزیر صنعت و پیدوار، وزیر ڈٹ بندی، وزیر انفارمیشن ٹیکنالوجی و وزیر تعلیم آ تالان کمیٹی اس جوڑ کننگ نا پارت ہم کرینے۔ پنچ شنبے نا دے آ وزیراعظم عمران خان نا کماشی ٹی ملک اٹی انٹرنیٹ نا کوریج ءِ ودفنگ و گچین کننگ نا بابت دیوان اس مس۔ دیوان اٹی بنجائی وزیر آئی ٹی سید امین الحق، بنجائی وزیر تعلیم شفقت محمود، سیکرٹری آئی ٹی، چیئرمین پی ٹی اے، سی ای اویونیورسل سروس فنڈ(یوایس ایف) و ایلو آفیسر آک ساڑی ئسر۔ دیوان اٹی وزیراعظم ءِ مچ آ ملک اٹی خاص کر مرمرانگاو پدسلوک آ علاقہ غاتیٹی انٹرنیٹ نا کوریم و گچین سروس نا فراوانی نا بابت یو ایس ایف نا کنڈآن تدوک آ اِراسال نا ڈٹ و اینخو سال انا ہدف آتا باروٹ سرجم حوال تننگا۔ دیوان اٹی بلوچستان اٹی لسبیلہ،آواران، کیچ، گوادر، خضدار، قلات، مستونگ، جعفر آباد، نصیر آباد، لہڑی، کچی، سبی، پشین ، قلعہ سیف اللہ، لورالائی، موسیٰ خیل و بارکھان نا ضلع، صوبہ سندھ اٹی گھوٹکی، قمبر، شہداد کوٹ، نوشہروفیروز، شکارپورپین پین، صوبہ خیبرپختونخوا ٹی چترال، صوابی، بنوں، پنجاب اٹی ساہیوال، ملتان، چکوال و اٹک تون اوار چندی علاقہ غاتیٹی انٹرنیٹ سروس نا فراوانی و گچینی کن چندی ڈٹ آتا پیش رفت آن معلومدار کننگا۔ اوار مروک علاقہ غاتیٹی انٹرنیٹ نا آسراتی تا فراوانی نا بابت پیش رفت آہم سرجم حوال تننگا۔ وزیراعظم ءِ پاننگاکہ یوایس ایف نا کنڈآن انٹرنیٹ نا سروسز نا گچین فراوانی ءِ پک کننگ کن فائبر آپٹک شاغنگ آ خصوصی چکار کننگ انگ ءِ، تدوک آ اِراسال اٹی ہڑدہ سد کلومیٹر مرغن فائبر آپٹک بلوچستان وخیبرپختونخوا نا چندی علاقہ غاتیٹی تالان کننگا وخت اس کہ دا سال 547 یونین کونسل آتیٹی 4600 کلومیٹر فائبر آپٹک تالان کننگک۔