بنجائی کابینہ نا بین المذاہب ہم آہنگی کانفرنس اڈتننگ نا فیصلہ

بنجائی کابینہ نا بین المذاہب ہم آہنگی کانفرنس اڈتننگ نا فیصلہ

0

Get real time updates directly on you device, subscribe now.

اسلام آباد: بنجائی کابینہ بین المذاہب ہم آہنگی نا مون آ دننگ کن بروک آ ہفتہ قومی کہول آ بین المذاہب ہم آہنگی کانفرنس اس اڈتننگ نا پارت کرینے وخت اس کہ نگران وزیراعظم انوارالحق کاکڑ پارینے کہ ملک اٹی انتہاپسندی و مذہبی بے چیٹی نا اسُل موکل تننگپک۔ پاکستان اٹ ساڑی اقلیت آتا رکھ ریاست نا اولی فرض انا بشخ ءِ۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ نگران وزیراعظم انوارالحق کاکڑ نا کماشی ٹی عبوری بنجائی کابینہ نا دیوان مس۔ دیوان اٹی وزیراعظم بنجائی کابینہ ءِ تینا جڑانوالہ دورہ غان معلومدار کرے۔ وزیراعظم پارے کہ پاکستان اٹ ساڑی اقلیت آتا رکھ ریاست نا فرض ءِ۔ ملک اٹی انتہاپسندی و مذہبی بے چیٹی تا اسُل موکل تننگپک۔ اوپارے کہ جڑانوالہ نا واقعہ ٹی زموا ربندغ آتا سزا ءِ پک کننگک۔ کابینہ بروک آ ہفتہ قومی کہول آ بین المذاہب ہم آہنگی کانفرنس اس اڈتننگ نا پارت کرے ہراٹی چندی مذہب آتا راہشون و چندی مکتبہ فکر انا عالم دین تے بٹنگ انگک۔ کانفرنس پاکستان اٹ بین المذاہب ہم آہنگی نا مون آ دننگ کن مزل نا نشان مریک۔ بنجائی کابینہ وزارت خزانہ ناسفارش آ مالی سال 2023-24کن دیت نا زر ہراکہ 30،630 گرام چاندی نا بریبرمریک ءِ 67 لکھ 57 ہزار 902 روپئی مقرر کرینے۔ نگران وزیراعظم انوارالحق کاکڑ کابینہ نا دیوان آن تران کرسا پارے کہ نگران حکومت چنکو وخت اسے کن بسنے، بنداوی زمواری گچین کاری تیکن پبی کمک فراوان کننگ ءِ، حکومتی نظام کار اٹی بھلو بدلی اس اتنگ کپنہ، قاعدہ و ضابطہ ٹی سنگین خلاف ورزی نا دروشم اٹ نیام تمنگ نا واکداری دوئی ءِ۔ نگران وزیراعظم پارے کہ آئین نا رداٹ نگران حکومت چنکو وخت اسے کن بسنے، اونا بنداوی زمواری گچین کاری تیکن پبی کمک فراوان کننگ و چاروکی ءِ و داآئینی خواست ءِ۔ نگران حکومت تون ہڑدے ئی حکومتی باندات آتا چاروکی نا اختیار ءِ۔ نن حکومتی نطام کار ٹی بھلو بدلی اس اتنگ کپنہ۔ معمول نا پالیسی تیا عمل کرسا کینہ۔ وزیراعظم پارے کہ تدوک آ حکومت نا پالیسی تے برجاتخنہ۔ قاعدہ و ضابطہ ٹی سنگین خلاف ورزی تا دروشم اٹ نیام تمنگ نا اختیار دوئی ءِ۔ قومی اسمبلی آئینی مد ءِ پورو کرسا تحلیل مسنے۔ الیکشن داسکان مروئی ءِ۔ پارلیمان نا ایوان بالا کاریم کننگ ءِ ہراتم اسکان قومی اسمبلی نا ایوان بفک کانود سازی مننگ کپک۔ غٹ وزیر آتا تینا وزارت آتون حوال نا عمل بناکرینے۔ بروک آ کابینہ دیوان نا ایجنڈا نا فیصلہ ءِ حوال نا بنداو آ کننگک۔

(اے پی پی)

Get real time updates directly on you device, subscribe now.

Leave A Reply

Your email address will not be published.