خان ثانی نواب اسلم نا وڈھ جھیڑہ ٹی ثالثی نوری نصیر خان نا یات اس تازہ کرے‘ ماما خان محمد نیچاری

منگچر: سیاسی قبائلی راہشون ماماخان محمدنیچاری خالق آبادی تینا بیان اسے ٹی پارینے کہ خانِ ثانی، سرسرداران سراوان نواب محمداسلم رئیسانی وڈھ انا جھیڑہ ٹی ثالثی کرسا خان نصیرخان نوری نا یات اس تازہ کرے و کل قبیلہ غاتا اُست آتا درے انتئے کہ دا نازرک آ وخت آ فریق آتیٹی جنگ بندی کرفسا دا پاش کرے کہ دا وخت اسکان چیف آف سراوان نواب محمداسلم رئیسانی تینا باوہ پیرہ نا کسر آ چلینگسا قبائلی روایت آتا امین ءِ و تینا قبائلی عہدہ نا پاسداری ءِ کرسا قبائلی تا مفاد آتیکن ہر وڑ نا جہد کننگ آن تینے پدی کپنہ۔ سرِسرداران سراوان نا خاہوت نواب ملامحمد رئیسانی تون قبائلی پڑ تاریخ اس مننگ اٹی ءِ۔ نن خان ثانی چیف آف سراوان نواب محمداسلم رئیسانی، نوابزادہ حاجی لشکری رئیسانی، نوابزادہ رئیس رئیسانی ءِ وڈھ جھیڑہ ٹی فریق آتا نیام اٹ جنگ بندی کرفنگ آ مبارکبادی ایتنہ۔

(آن لائن)