حکومت وانتظامیہ مالدار وبیوپاری تا ویل آتے ایسر کے‘غلام نبی مری

کوئٹہ (آن لائن) بلوچستان نیشنل پارٹی نا بنجائی کمیٹی نا باسک غلام نبی مری حکومت آن خواست کرینے کہ مالدار‘ بیوپاری تتون بھلا عئید انا رد اٹ باندات آتے صبر اٹ ایسر کننگے‘ دا حالیت آتے ٹی ہراتم اوسال اٹ اسہ وار بریرہ و تینا مال تے بہا کیرہ دا حالیت آتے ٹی حکومت نئے بیرہ کورونا غان بچنگ بلکہ بیوپاری تا مشکل آتے مون آ تخسا گام گیج کے۔ اوپارے کہ سال اٹ اسہ وار بھلا عئید آ مالدارک کوئٹہ غا بریرہ ہرافک مچ آسال تینا کٹیا ءِ تینا مال تیا خڑچ کیرہ ولے بدبختی اٹ صوبائی دارالحکومت کوئٹہ تون اوار ایلو علاقہ غاتے ٹی مالدار و بیوپاری تیکن جوان بست وبند مفننگ ناسوب آن نئے بیرہ بیوپاری بلکہ لس بندغ آتے ہم مشکل آک مون تروئی تمنگ ءُ۔او پارے کہ اِرا دے مست انتظامیہ و محکمہ جانجوڑی نا کنڈآن پڑی ٹی کیمپ اڈ تننگا دا سخت انگا باسنی ٹی تو ایہن دے آ پیری کروک آتا ٹمپریچر ودک ولے دا حالیت آتے ٹی ہراتم او زرگزرانی بدحالی آن بچنگ کن داڑے بریرہ و ولدا ااسکریننگ آن پد اوفتے ساہدار تیانبار اسہ ہند آ کننگ‘ اوفتتون بدسلوکی و اوفتیا بیداد کننگ نا است ہسونی ناسوب ءِ۔ او پارے کہ اگہ پڑی اڈ تننگ کن جوان بست وبند مف تو ولدا شار اٹ گلی گلی ٹی پڑی لگک ہرانا سوب آن کورونا وائرس نا تالان مننگ نا خلیس ودک بلکہ کانگو نا تالانی ناسوب ہم مریک۔