فواد چوہدری نا پیش گوہی پک، نوک خننگا، اینو چنکا عئید ءِ

0

Get real time updates directly on you device, subscribe now.

اسلام آباد (آن لائن/ تلار ڈیسک) پاکستان اٹی شوال نا نوک خننگانے، مچ آ ملک اٹ اینو 24 مئی یک شنبے نا دے چنکا عئید ءِ۔ شوال نا نوک ءِ ہُننگ کن بنجائی رویت ہلال کمیٹی نا دیوان کراچی ٹی مفتی منیب الرحمان نا کماشی ٹی مس، دیوان آن پد پریس کانفرنس اٹی مفتی منیب الرحمان نوک ءِ خننگ نا پڑو کرے، دیوان اٹی محکمہ موسمیات نا چاہندار آک ہم ساڑی ئسر، داڑتون اوار ایلو صوبہ غاتا ہم زونل رویت ہلال کمیٹی تا دیوان مس، ہراکان شاہدیک بنجائی رویت ہلال کمیٹی آ راہی کننگا۔ دا وخت آ پریس کانفرنس نا وخت آ مفتی منیب الرحمن پارے کہ نوک ءِ خننگ نا شاہدیک بلوچستان نا علاقہ چمن و پسنی آن رسینگانو، وخت اس کہ راولپنڈی آن بروک آ شاہدی تے امنا کننگتو۔ داکان مست بنجائی وزیر سائنس اینڈ ٹیکنالوجی فواد چوہدری پارینے کہ ننا کلینڈر نا رد اٹ اینو پاکستنا اٹی عئید ءِ۔ دنیا نا غٹ اسلامی ملک آتیٹی اینو عئید مریک۔ نوک 7 بجہ و 36 منٹ آن 8 بجہ و 14 منٹ اسکان خننگک۔ سلاہ سوج آتےراہی کرینن، وزیراعظم آفس انت کہ فیصلہ کرے عمل کینہ۔ سرجم حوال آتا رد اٹ بنجائی وزیر سائنس اینڈ ٹیکنالوجی فواد چوہدری پریس کانفرنس کرسا پارے کہ نوک انا بابت ملک اٹ اسہ جھیڑہ اس برجا ءِ۔ ہر سال عئید انا نوک انا وخت آ اختلافی ویل ودی مریک، شہاب الدین پوپلزئی ہرسال عئید انا نوک انا جتا پڑو کیک۔ فواد چوہدری پارے کہ دنیا ٹی نوک ءِ ہننگ نا ہچ ءُ ویل اس سلتنے۔ اسلام عقل و علم انا دین اسے۔ آئین نا رد اٹ گڑا تے بایدے ہُننگے۔ مذہبی پڑک آتے گڑا تے سٹی ول ویچڑ کننگ نا شوق ءِ، دا وڑ اٹ فرقہ وارانہ پڑک آک تیان بشخ ءِ خواہنگ نا بناءِ کیرہ۔ بنجائی وزیر پارے کہ عینک اٹ ہرا نوک ءِ ہُننگک، او ہم تو اسہ ٹیکنالوجی اسے۔ سائنس نا شونداری آن نوک ءِ ہُننگ نا عمل بھاز آسان مسنے۔ ریاست فرقہ واریت، پڑکی اختلاف آن ایڑتر مریک، نوک انا باندات ننے مولویک پارہ کہ سائنس نا ہچ ءُ کاریم اس اف، نم ہرا عینک ءِ بینرے، ہرا دوربین اٹ ہُررے، او سائنس تو ارے۔ اونا پاننگ ئس کہ رویت ہلال کمیٹی مدام جھیڑہ نا گواچی مسنے۔ نوک ءِ ڈغار نا داپار ایپار چکر ءِ پورو کننگ اٹ 29 دے آ زیات وخت لگک، ہراتم دے، نوک و ڈغار اسہ ریسہ اٹ بریرہ تو ڈغار آن نوک خننگپک، واد چوہدری پارے کہ سعودی عرب نا کیلنڈر اٹی اسہ منٹ اسے آن پد دے کی ہلنگ نا فرق مرے تو او نوک ءِ خننگ نا پارہ۔ اسلامی کلینڈر جاری کرینو، ولے دا ہیت مون آ بس کہ نوک انا خننگ انگ المی ءِ۔ نن رویت ایپ اس جوڑ کرین، ہراڑا نوک انا ہمو وخت آ کنڈ انا سما تمک۔ بنجائی وزیر سائنس اینڈ ٹیکنالوجی پارے کہ 22 مئی نا نن دہ بجہ و 39 منٹ آ شوال نا نوک ودی مسنے، 7 بجہ و 36 منٹ آ دے اندر مریک، 7 بجہ و 36منٹ آن پد نوک ءِ ہُننگ مریک۔ سانگھڑ، بدین، ٹھٹھہ، جیونی، پسنی ٹی نوک خننگک۔ تعلقدار علاقہ غاتیٹی شاریک 8بجہ و 14 منٹ اسکان نوک ءِ ہُننگ کیرہ۔ تعلقدار علاقہ غاتیٹی 20گھنٹہ نا نوک اس مریک۔ او پارے کہ دنیا نا غٹ اسلامی ملک آتیٹی اینو عئید ءِ۔ سعودی عرب، ترکی، انڈونیشیا تون اوار ایلو ملک آتیٹی عئید مننگ ءِ۔ ننا کلینڈر نا رد اٹ اینو پاکستان اٹی ہم عئید مریک۔ سعودی عرب اٹی رویت ءِ چٹفنگانے، تینا کلینڈر ءِ ہُررہ عئید کیرہ۔

Get real time updates directly on you device, subscribe now.

Leave A Reply

Your email address will not be published.