ایس او پی تیا عملدرآمد کن فوج آن کمک ہلنگ نا فیصلہ

0

Get real time updates directly on you device, subscribe now.

اسلام آباد (اے پی پی) وزیراعظم عمران خان قوم آن خواست کرینے کہ کورونا دین آن بچنگ نا رکھی گام گیج آتیا سختی اٹ عمل کیر و ماسک ضرور بینر ایلودروشم اٹ سخت لاک ڈاؤن کروئی تمک۔ پاک فوج سڑک آتیا پیش تمسا ایس او پی تیا عملدرآمد کرفنگ کن پولیس و کانود نافذ کروک آ ادارہ غاتا کمک ءِ کیک۔ حکومت داسہ سختی کیک۔ او جمعہ نادے آ کورونا دین انا بابت قومی رابطہ کمیٹی نا دیوان آن پد گپ وتران کریکہ۔ بنجائی وزیر اسد عمر، بنجائی وزیر حوالکاری و شینکاری، خصوصی کمکار قومی جان جوڑی و قومی رابطہ کمیٹی نا بشخ ہلوک آک ہم داوخت آ ساڑی ئسر۔ وزیراعظم پارے کہ کورونا دین انا کیس آتے ٹی ترندی اٹ ودکی مننگ ءِ، ای قوم آن خواست کیوہ برائے مہربانی ایس او پی تیا عمل کیر۔ وزیراعظم پارے کہ نن وار وار الس ءِ پارسا کرینن کہ او ایس او پی تیا عمل کیر ولے مخلوق چکار کپک ماسک بیننگ آن نیمہ ویل ایسر مریک، خدانخواستہ اگہ بھارت کون آ حالت مس تو شار تیٹی لاک ڈاؤن کروئی تمک۔ وزیراعظم پارے کہ لاک ڈاؤن آن دوکاندار و فیکٹری مالک آتون اوار ہر قومی زہمی مریک ولے دیہاڑی دار اسُل خوار مریک۔ لاک ڈاؤن نا سلاہ تننگ انگ ءِ ولے داسکان نن داوڑ کپننگ اُن انتئے کہ ننے راج انا نزور تپہ نا مشکل آتا احساس ارے۔ دیہاڑی دار مزور ہرڈے کٹیا کیک ولدااو و اونا چناک کُننگ نا قابل مریرہ، ننے مشکل آتا احساس ارے ولے اگہ کورونادین آن زہمی کیس آک ودسا ہنار تو آخر نن ہراوخت اسکان لاک ڈاؤن آن بچفنگ کپنہ۔ وزیراعظم پارے کہ تدوک آ روچہ مبارک اٹی الس احتیاط کرے ہرانا سوب آن حالیت آک گچین ئسر۔ پاکستان اٹی مسیت آک بند الور، عالم دین و آئمہ کرامک الس اٹ ایس اوپی تا بابت شعور تالان کریر ولے داسہ مخلوق ایس او پی تیا عمل کپننگ ءِ، ننا زرگزران ہرا کورونا دین آن پد ہم گچینی ناکنڈآ ہناکہ، ءِ لاک ڈاؤن آن نسخان رسینگک۔ عمران خان پارے کہ دیوان اٹی فیصلہ کننگانے کہ فوج سڑک آتیا پیش تمسا ایس او پی تیاعملدرآمد کن پولیس و کانود نافذ کروک آ ادارہ غاتا کمک ءِ کیک۔ اوپارے کہ حکومت پبی کوشست کننگ ءِ ہراہراملک آتیان ویکسین ملنگ کیک، دوئی کننگے۔ چین آن ہم ویکسین خواہسونن ولے چین آ پین ملک آتا کنڈآن ویکسین نا فراوانی کن بھاز زور ءِ و یکسین برے ہم تو شاری تاویکسینیشن اٹ اسہ سال انا وخت لگک، کل آن جوان و آسام کاریم دادے کہ نن احتیاط اٹ کاریم الین و ایس او پی تیا سختی اٹ عمل کین، بیرہ ماسک بیننگ آن نیمہ ویل ایسر مریک۔ وزیراعظم پارے کہ داسہ حکومت ایس او پی تیاعملدرآمدکرفنگ کن سختی کیک و فوج، پولیس و کانود نافذ کروک آ ادارہ غاتا کمک اٹ ایس او پی تیا عملدرآمد کن پورو زور خلیک۔

Get real time updates directly on you device, subscribe now.

Leave A Reply

Your email address will not be published.