حکومت و اپوزیشن نا مذاکرات بے سہب

اسلام آباد (آن لائن) قومی اسمبلی نا کارروائی ءِ جوان ءُ وڑ اسے ٹی چلیفنگ و کانود سازی نا بابت ویل آتے پورو کننگ کن حکومت و اپوزیشن نا نیام اٹ مذاکرات جمعہ غا بے سہب مس۔ اپوزیشن حکومتی وزیر تے جوان وڑاٹ پارے کہ اگہ حکومت اپوزیشن آن مسختی کمک خواہک تو کانود جوڑ کننگ نا پیدوار ءُ ایجنڈا اس مونی اتے۔ اپوزیشن راہشون تے غدار و ایجنٹ کننگ نا ہیت ءِ چٹفنگے۔ وخت اس کہ حکومت نا پاننگ ءِ کہ اپوزیشن تون ہیت وگپ نا مسخت پارلیمانی چاگڑد ءِ جوان کننگ ءِ۔ حکومت و اپوزیشن نا نیام اٹ ہیت وگپ نا اسہ پین دور اس دو شنبے آ مریک۔ حوال نا رداٹ تدوک آ دے قومی اسمبلی نا دیوان آن پد اپوزیشن لیڈر شہباز شریف نا چیمبر اٹ حکومت و اپوزیشن نا مذاکرات مس حکومتی ڈل اٹ وزیر دفاع پرویز خٹک،وزیر مملکت پارلیمانی امور علی محمد خان و خاص انگا کمکار عامر ڈوگر اوار ئس وخت اس کہ اپوزیشن نا ڈل اٹ شاہد خاقان عباسی،احسن اقبال، رانا تنویر، راجہ پرویز اشرف، نوید قمر، اسد محمود، مریم اورنگزیب و خرم دستگیر اوار ئسر۔ وزیر دفاع پرویز خٹک پارینے کہ ہمو سیاسی بیانک مریرہ ہرافتے نم ہم ایترے نن ہم ایتنہ ولے ننا داڑے بننگ نا مسخت پارلیمنٹ اٹ کانود سازی ٹی اپوزیشن نا کمک ءِ دوئی کننگ ءِ انتئے کہ بھاز آ اہم انگا بل آتے ایوان اٹ پیش کننگے اپوزیشن نا سلاہ ئس کہ حکومت اولیکو کانود سازی نا ایجنڈا ءِ مون آ اتے انتئے کہ نن نیب کانود اٹ ترمیم نا ہیت کینہ تو پاننگک کہ دا این آر او خوارہ ہندا سوب آن حکومت پیدوار ءُ ایجنڈا اسے تون مون آ برے۔ حوال نا رداٹ اپوزیشن اپوزیشن لیڈر شہباز شریف، (ن) لیگ نا پارلیمانی لیڈر خواجہ آصف و پیپلز پارٹی نا راہشون سید خورشید شاہ نا پروڈکشن آرڈر ءِ جاری کپننگ آ ہم حکومتی وزیرک بھاز برانز کریر و پاریر کہ نن اوفتا پروڈکشن آرڈر ءِ جاری کننگ نا درخواست ءِ کپنہ۔