اپوزیشن نا کبینی آ حکومت نا برخلاف مچ آ ملک اٹ برانز نا بنا

اسلام آباد/کوئٹہ: اپوزیشن ناکنڈآن برانز نا خواست آن پد لاڑکانہ، سکھر، جیکب آباد، مہمند، زیارت و مینگورہ تون اوار چندی شار تے ٹی مخلوق سڑک آتیا پیش تما‘ برانز اٹ اوار بندغ آک کبینی و حکومت نابرخلاف نعرہ خلکر ودمدستی ریلی نا خواست کریر‘ چمن اٹ کوئٹہ چمن شاہراہ غا ریلی ان سوب آن ٹریفک معطل مس‘ برانزیک پاریر کہ کبینی نا سوب آن زند عذاب مسنے‘ کراچی ٹی ہم پی ڈی ایم نا کنڈآن صدر ایمپریس مارکیٹ آ برانزی مچی اڈ تننگا‘ وخت اس کہ لاہور اٹ (ن) لیگ ناکنڈآن چندی شاہراہ تیا برانز کننگا‘ قومی اسمبلی ٹی قائد حزب اختلاف شہباز شریف مخلوق آن کبینی نا برخلاف مچ آ ملک اٹ برانزی مچی تے ٹی بشخ ہلنگ ناخواست کرینے۔ مسلم لیگ ن نا صدر شہباز شریف تینا بیان اٹ پارینے کہ حکومت ءِ پین وخت تننگ نا مسخت الس نا پین بھسکاری‘ پین کبینی و پین بے روزگاری ءِ‘ اوپارے کہ ظالم حکومت آن نجات دوئی کننگ آن بیدس ملک و قوم انا زرگزران گچین مننگ کپک۔ شہباز شریف پارٹی راہشون تے شاری وواپاری تنظیم و السی انجمن تتون اسیجائی اٹ کاریم کننگ نا پارت کرے و او الس آن کبینی نابرخلاف مچ آ ملک اٹ مروک برانزی مچی تے ٹی بشخ ہلنگ ناخواست کرے۔ ایلو کنڈآ پی ڈی ایم نا ترجمان حافظ حمداللہ پارینے کہ کبینی نابرخلاف الس نا توار جوڑ مرسا سڑک آتیا پیش تمنگ اٹی ان‘ داسہ‘گھبرانے‘ ناوخت بسنے اگہ اینو ہم قوم سڑک آتیا پیش تمپک تو کبینی نا سونامی قوم ءِ ڈبیفک۔