تحریک انصاف پارلیمنٹ اٹ تینا کڑد ءِ سر ایتے، چیف جسٹس
Get real time updates directly on you device, subscribe now.
اسلام آباد: چیف جسٹس آف پاکستان جسٹس عمر عطاء بندیال پارینے کہ تحریک انصاف پارلیمنٹ اٹ تینا کڑدار ءِ ادا کے‘ کروڑ آبندغ آک دا وخت آنوکاپ نا سوب آن بے اُرا مسنو‘ کنوئی ءُ دیر و کُننگ کن ارغ اف‘ پیشن ملک آن مخلوق نوکاپ نازہمی تتون کمک کننگ اٹی ءِ ملکی زرگزرانی حالیت آتے ہم ہننگے۔ چیف جسٹس دا ریمارکس آتے قومی اسمبلی آن کل استیفہ غاتے اسیجا منظور کننگ ناتحریک انصاف نا درخواست نا سماعت نا وخت آ کرے۔ چیف جسٹس عمر عطا بندیال و جسٹس عائشہ ملک آ ساڑی اِر باسکی بینچ سماعت کرے‘ سماعت نا بنا ٹی پی ٹی آئی نا وکیل فیصل صدیقی دلیل تس کہ قاسم سوری تحریک انصاف نا استیفہ غاتے منظور کریسس‘ استیفہ غاک منظور مسر تو دوارہ پک کننگ مفسہ‘ است پسند حلقہ غاتے ٹی گچین کاری مننگ کپک؟ شکور شاد آن بیدس پین اسہ باسک اس ہم استیفہ غان نمن متنے‘ ہائیکورٹ گوندا کہ اسپیکر ناکاریم اٹ نیام تمنگ کپنہ‘ ایلو کنڈآ شکور شاد نا درخواست آ اسپیکر نا پرمان ءِ معطل کرے۔ عمران خان نوکاپ نازہمی تیکن سینزہ ونیم ارب روپئی مچ کرے“ پی ٹی آئی نا باسک آک تینا حلقہ غاتے ٹی نوکاپ نازہمی تا کمک ءِ کننگ اٹی ءُ۔ چیف جسٹس پارے کہ اسپیکر نا استیفہ تروک اسمبلی باسک آتا پک کننگ نا تینا وڑوڈول اس مریک گڑا نن امر نیام تمنگ کینہ‘ ہر ادارہ نا تینا کاریم مریک‘ مگہ نن اسپیکر آن ارفینن کہ استیفہ غاتے انتئے پک کپننگ ءِ؟ اسلام آباد ہائی کورٹ نا چیف جسٹس جسٹس اطہر من اللہ کڑمبی اٹ کانود نا جاچ ءِ ہلسا فیصلہ کرینے‘ اسپیکر نا کاریم اٹ دا وڑ نیام تمنگ عدالت کن بھاز مشکل ءُ کاریم اسے‘ قاسم سوری نا فیصلہ ہمو ارادہ غانبار ءِ ہراوڑ بے پتی ناتحریک آ کریسس‘ لس گچین کاری تیکن مچ ءُ نظام اس مریک‘ ضمنی گچین کاری تے ٹی ٹرن آؤٹ ہم کم مریک۔ جسٹس عائشہ ملک ریمارکس تس کہ قاسم سوری نافیصلہ ٹی اسہ باسک اسے نا ہم پن اف ہرانا استیفہ ءِ منظور کننگانے‘ تحریک انصاف جماعت اسے نا وڑ عدالت آ امر بننگ کی؟ استیفہ تننگ باسک آتا انفرادی عمل مریک‘ تحریک انصاف سکروٹنی آن تینے کشنگ ءِ۔ چیف جسٹس کیس انا وخت آ ریمارکس تس کہ الس پنچ سال اکن گچین کرینے‘ نن خوانہ کہ پی ٹی آئی پارلیمنٹ تینا کڑدار ءِ ادا کے۔ پارلیمان اٹ کڑدارادا کننگ اصل فرض ءِ‘ پی ٹی آئی ءِ سماءِ کہ 123 نشست آ ضمنی گچین کاری آ اخس خڑچ بریک؟ ریاست نا باندات آتے ٹی وضع داری و سگ آن کاریم ہلوئی مریک‘ اشتاف کننگپ‘ سجفنگ نا اسہ پین وارخواہی اس تننگ اٹی ان‘ پارٹی آن پارمان ہلنگے۔ عدالت عظمی دا وخت آ پی ٹی آئی نا وکیل فیصل چوہدری ءِ پین تیاری نا وخت ترسا کیس انا سماعت ءِ بے مُد وخت اکن پد بٹے۔