آن لائن پاکستان اوپن شیڈو باکسنگ اینڈ فٹنس چیلنجز مقابلہ غاک بنا مسر

اسلام آباد (مانیٹرنگ ڈیسک) پاکستان باکسنگ فیڈریشن نا کنڈآن آن لائن پاکستان اوپن شیڈو باکسنگ اینڈ فٹنس چیلنج آک 2020ء نا مقابلہ غاک ایسر مسر، دافتا نتیجہ غاتا پڑو ءِ پد آن کننگک۔ دا مقابلہ غاتیٹی مچ آ ملک انا مُر انگا خلقی و شاری علاقہ غاتیان سد آتا کچ اٹ نرینہ و نیاڑی گوازی گرک جوان وڑاٹ بشخ ہلکر۔ دا ایونٹ اٹ مسہ کیٹگری نا مقابلہ تخنگاسُر، ہرافتے ٹی کیڈٹ انڈر 15، یوتھ انڈر 19 و ایلیٹ انڈر 40 نا مقابلہ غاک اوار ئسر۔ کلب کہول نا شیڈو ٹیسٹ 45 سیکنڈ آن اسہ منٹ اسکان ویڈیو اس ئس وخت اس کہ فٹنس نا چار جتا جتا ٹیسٹ ہراکہ 90 سیکنڈ آن دو منٹ نا ئسر، پاکستان باکسنگ فیڈریشن نا سیکرٹری جنرل کرنل(ریٹائرڈ) ناصر اعجاز تنگ پارینے کہ ایونٹ اٹ کیہی پُوسکن ءُُ چنک وہی نا یک و نیم سد گوازی گرتا ویڈیو کِلپ کم وخت و کیہی ٹیکنیکل سوب آتا بنداو آ رد کننگار انتئے کہ دا پُوسکن آ گوازی گرتے دا مقابلہ غاتا کانود نا بارواٹ زیات معلومداری دوئی الو، ہندا سوب آن اوفتا ویڈیو کِلپ آتے رد کننگاسُس، اومیت ءِ کہ بروک آ ایونٹ آتیٹی ہندا ورنا غا کم وہی انا گوازی گرتا گوازی گرتا کارکڑد پین جوان مریک۔ او پارینے کہ ایونٹ اٹی پنچ سد ویڈیو کِلپ دوئی مسر، ہرافتے آن سے و نیم سد انا کچ اٹ گوازی گرتا ویڈیو کِلپ آب انا رداٹ ئس۔ او پارینے کہ ایونٹ نا نتیجہ غاتے تیار کننگ کن اِرا جیوری کمیٹی جوڑ کننگا، ہرافتا منظوری ءِ فیڈریشن نا صدر چوہدری محمد خالد محمود آن ہلنگا۔