السی خذمت ننا سیاست نا اولیت آتیٹی اوار ءِ، سینیٹر ثمینہ ممتاز زہری

کوئٹہ، سینیٹر ثمینہ ممتاز زہری پارینے کہ السی خذمت ننا سیاست نا اولیکو اولیت ءِ انتئے کہ سیاست نا بنداوی مسخت الس نا خذمت، اوفتا ویل آتا ایسری و راج اٹی مثبت بدلی اتنگ ءِ۔ السی نمائندگی اسہ اہم ءُ زمواری اسے ہرانا خواست دادے کہ الس نا گرج آتے پہہ مرسا اوفتا آسراتی و آسودہی کن کڑد ادا کننگے۔ او پارے کہ السی خذمت نا جوزہ اسہ سرسہب و گچین سیاسی وڑ وڈول نا بنداو ءِ، وخت اس کہ السی ویل آتا ایسری کن سنجیدگی، سِخت و مدامگی خواری المی ءِ۔ او پارے کہ الس نا پت السی نمائندہ نا کل آن بھلا مڈی ءِ و دا پت ءِ برجا تخنگ کن المی ءِ کہ السی فائدہ غاتے ہر باندات اٹ اولیت تننگے۔ الس ءِ مون تروک مشکل آتا ایسری، بنداوی آسراتی تا فراوانی و راجی ویل آتا چٹفنگ کن کل دوئی وسیلہ غاتے گچین وڑ اٹ کاریم اٹ اتنگ وخت انا اہم ءُ گرج اسے۔ او پارے کہ السی خذمت بایدے بیرہ دعویٰ تسکان مف بلکہ اونا مثبت زہمک لس بندغ نا زند اٹ ہم خننگر۔