پی ڈی ایم نا مچ آ ملک اٹ نماز جمعہ غان پد برانز کننگ نا پڑو

اسلام آباد: حکومت مخالف اپوزیشن سیوت پاکستان ڈیموکریٹک موومنٹ (پی ڈی ایم) اینو نماز جمعہ غان پد برانز آتا بنا ءِ کننگ نا پڑو کرینے۔ پی ڈی ایم اینو مچ آ ملک اٹی کبینی و بے روزگاری نا برخلاف برانز کیک۔ پی ڈی ایم نا کنڈ آن جاری کروک شیڈول نا رد اٹ لاہور اٹی جین مندر چوک آن پیشیم تون 3 بجہ غا برانزی جلوس اس کشنگک، کراچی ایمپریس مارکیٹ آ نماز جمعہ غان پد 3 بجہ غا برانز کننگک۔ پشاور، سوات، شانگلہ و خیبرپختونخوا نا ایلو شار تیٹی ہم برانز کننگک۔ داکان بیدس میانوالی و بھکر اٹی 24 اکتوبر آ برانز کننگک۔ ن لیگ نا ترجمان مریم اورنگزیب ہم دا ہیت ءِ پک کرینے کہ نماز جمعہ غان پد لاہور، کراچی، پشاور، سوات، شانگلہ تون اوار ایلو شار تیٹی برانز کننگک۔ پی ڈی ایم نا اسٹیئرنگ کمیٹی نا دیوان آن پد ترجمان پی ڈی ایم حافظ حمد اللہ پارے کہ صوبائی کہول آ کمیٹی جوڑ کننگک، پنجاب، بلوچستان، کے پی، سندھ و اسلام آباد نا کہول آ کمیٹی جوڑ مریک۔ صوبائی کمیٹیک ضلع غاتتون سلاہ کرسا برانز نا ہند آتے پک کیرہ۔ حافظ حمداللہ پارے کہ حکومت نا برخلاف اینو آن بنا کروک آ برانز نا وخت اِرا ہفتہ اسکان ءِ، ہرا وخت اتون اوار ودنگ ہم کیک۔ پی ڈی ایم نا سرکردہ و باسک آک برانز آتیٹی زیات آن زیات بشخ ہلیرہ۔ مسلم لیگ (ن) ہم جمعہ نا دے مچ آ پنجاب اٹی حکومت مخالف برانز نا پڑو کرینے۔ مسلم لیگ (ن) پنجاب نا تنظیمی دیوان صوبائی سیکرٹریٹ ماڈل ٹاؤن اٹی مس، ہراٹی ایم این اے، ایم پی ایے، ٹکٹ ہولڈر و عہدیدار آتتون اوار اپوزیشن لیڈر حمزہ شہباز ہم ساڑی ئس۔ دیوان اٹی مچ آ پنجاب اٹی مروک حکومت مخالف برانزی مچی نا معاملہ غا سجفنگا۔ دیوان آن پد میڈیا تون ہیت وگپ کرسا رانا ثنااللہ پارے کہ حکومت مخالف سیوت (پی ڈی ایم) نا سرکڑدہ غاتا فیصلہ نا رد اٹ نن پنجاب اٹی جمعہ نا دے آن برانز کننگ نا فیصلہ کرینن۔ اگہ لانگ مارچ نا گرج مس تو مریم نواز یا شہباز شریف کماشی ءِ تے کیرہ۔ وخت اس کہ لانگ مارچ اسلام آباد ءِ سر مس تو نواز شریف نا ہم اوار مننگ نا گمان ارے۔ او پارے کہ پنجاب اٹی ان ہاؤس بدلی کن پیپلز پارٹی 15 وونٹ انا بست و بند ءِ کے، ننا وونٹ آک حاضر ءُ۔ رانا ثنااللہ نا پاننگ ئس کہ حکومت نا نابودی نا سوب آن وخت آ ایل این جی نا سودا متو، ہراڑان بجلی نا نہاد آتیٹی ودکی مسنے۔