مچ آ ملک اٹی 24 گھنٹہ ٹی کورونا دین انا 100 پوسکن ءُ کیس رپورٹ
Get real time updates directly on you device, subscribe now.
اسلام آباد : مچ آ ملک اٹی 24 گھنٹہ ٹی کورونا دین انا 100 پوسکن ءُ کیس رپورٹ مسنے ہرافتیان 18 ناجوڑ آتا حالیت نازرک ءِ۔ دوشنبے نادے آ قومی ادارہ جان جوڑی (این آئی ایچ) نا کنڈآن جاری حساب وکتاب نا رداٹ مچ آ ملک اٹی 24 گھنٹہ ٹی کورونا دین انا 3 ہزار 147 ٹیسٹ کننگا ہرافتیان 100 بندغ آتا ٹیسٹ مثبت بس، مثبت کچ 3.18 درسد ئسک و داوخت آ کورونا دین آن اسہ ناجوڑ اس ہم زوال کتنے ولے 18 نا حالیت نازرک ءِ۔ تدوک آ 24 گھنٹہ ٹی ملک انا چندی شار تیٹی کروک آ کورونا ٹیسٹ و مثبت کیس آتا بابت لاہور اٹی 435 ٹیسٹ آتیٹی 18 بندغ آتا ٹیسٹ مثبت بس و ہموڑے کچ 4.14 درسد ئس، ہندا وڑ اسلام آباد اٹی 205 ٹیسٹ آتیٹی 25 بندغ آتا ٹیسٹ مثبت بس و کچ 12.20 درسد ئسک وخت اس کہ گجرات اٹی کروک آ 120 ٹیسٹ آتیان اسہ بندغ اسے نا ٹیسٹ مثبت بس و ہموڑے مثبت کیس آتا کچ 0.83 درسد ئسک۔
(اے پی پی)