تحریک انصاف حکومت تعمیراتی بشخ اٹ انقلاب اس اتیک‘سینیٹر شبلی فراز

اسلام آباد (آن لائن) بنجائی وزیر اطلاعات سینیٹر شبلی فراز پارینے کہ تحریک انصاف نا حکومت تعمیراتی بشخ اٹ انقلاب اس اتینہ، دسمبر اسکان دا بشخ اٹ 400ارب روپئی نا سرمایہ کاری مریک۔ تعمیراتی بشخ اٹ ہرا پراجیکٹ بنا مننگ اٹی ءِ، حکومت داڑا سرمایہ کار آتون ملسا اسہ روڈ شو اس کیک تانکہ پیشن ملک آتیٹی رہنگوک آ پاکستانیک سرمایہ کار آتے دانا ترغیب ءِ تننگے۔ دا خیال آتا درشانی ءِ او تدوک آ دے پی آئی ڈی ٹی اسہ پریس کانفرنس اسے آن تران کرسا کرے۔ او دا پارے کہ تعمیرات اسہ ہندن ءُ بشخ اسے ہرانا اثرک کل بشخ آتیا تمرہ۔ اُلس ءِ روزگار رسینگک۔ او پارینے کہ وزیراعظم نا کماشی ٹی ملک انا پنی آ سرمایہ کار آتون اسہ میٹنگ اس مس ہراٹی عتیق کریم ڈھیڈی، عارف حبیب، حسن بخشی و ایلوفک بشخ ہلکر۔ ہندا سرمایہ کار آتا کنڈآن بھاز اہم انگا سلاہک مون آ بسر ہرافتیا عمل کننگک۔ وزیراعظم پارت کرے کہ داوڑ نا میٹنگ آک ہفتہ ٹی اِرا وار المی مریر تانکہ ننے معلوم مرے کہ نن ہرا پارہ غا ہننگ اٹی اُن۔ میٹنگ اٹ اسٹیٹ بنک نا گورنر ڈاکٹر رضا باقر ہم خاص وڑاٹ بشخ ہلک۔ او بنکنگ سیکٹر اٹ قرض آتے ہرا شڑت آ تننگ نا دا سلاہ تے تسنے۔ میٹنگ اٹ ایف او سی و ایلو کل ویل آتیا بے کچ ہیت وگپ مس۔ وزیرحوالکاری پارینے کہ کورونا نا سوب آن دنیا نا زرگزران بھس مس ولے اللہ نا شکر ءِ کہ پاکستان نا اُلس داڑان زیات زہمی متو۔ ننے آ اللہ تعالیٰ نا خاص ءُ مہربانی اس مسنے۔ او وخت آ احساس پروگرام نا چیئرمین ڈاکٹر ثانیہ نشتر پارینے کہ احساس پروگرام نا کچ ءِ پین تالان کننگ انگ ءِ او داسہ 203ارب روپئی حقدار آ خاہوت آتیٹی بشخ وپانٹ کننگانے۔ دا پروگرام نا رداٹ 1کروڑ 69 لکھ خاہوت آتیا پیسہ بشخ وپانٹ کننگک۔ کورونا ٹی جہانی کہول آ ننا پروگرام نا جوانی نا ستا ءِ کننگا کہ ہرا داخس ترندی ٹی حقدار آ خاہوت آتیٹی پیسہ غاتے بشخ وپانٹ کرے۔ احساس پروگرام سیاسی بنداو آتیا اف، داڑی بےدس فرق آن ضرورت مند آ خاہوت آتیا پیسہ غاتے بشخ وپانت کننگا۔ دانا جوان انگا مٹ سندھ ءِ، ہرا احساس پروگرام نا رداٹ کل آن زیات فائدہ ہرفنگ اٹی ءِ، احساس پروگرام نا رداٹ 31 درسد پیسہ سندھ انا حقدار آ پاکستانی تے تننگا۔ دانا جوانی نا اندازہ ءِ داکان خلنگ کینہ کہ وزیراعظم تینا مرضی آن نہ کس اسے دا پروگرام اٹ انٹری کننگ کیک او نہ کشنگ کیک۔ نن بیدس سفارش آن میرٹ آ کاریم کرینن۔