کورونا نا بابت سٹی معلومداری تروک آتا برخلاف کارروائی کننگک‘اعجاز شاہ

اسلام آباد ( آن لائن)حکومت کورونا وائرس نا بابت غلط معلومداری تا توننگ کن 9 باسکی کمیٹی اس تشکیل تس۔ ڈائریکٹر سائبرونگ ایف آئی اے و ڈی جی پیمرا ءِ زموار آتا برخلاف سخت کارروائی نا پارت کرینے۔ تدوک آ دے وزیرداخلہ اعجاز احمد شاہ نا کماشی ٹی کورونا نا بابت دیوان اٹ مس ہراٹی کورونا وائرس نا بابت اُلس اسکان سٹی آ معلومداری تے رسیفنگ آ اُست ہسونی نا درشانی ءِ کرینے۔ وزیر داخلہ اعجاز ڈائریکٹر سائبر ونگ ایف آئی اے ءِ پارت کرینے کہ سٹی و بیدس پک کننگ آن معلومداری تولان کروک آتا برخلاف سخت کارروائی کننگے، مانیٹرنگ و ایکشن ءِ وخت آ کننگے و زموار آتا برخلاف زوت اس کارروائی کننگے، دا وڑ نا فیک انگا نیوز و سٹی آ انفارمیشن تے تالان کروک آ ملک و اُلس نا خیرخواہ افس،کمیٹی نا تشکیل نا مسخت اُلس اسکان صحیح معلومداری رسیفنگ ءِ پک کننگ ءِ، سٹی و بیدس پک انگا خبر تا تالانی نسخان دہ مننگ کیک، نن کل ممکن آ وسیلہ غاتیان کاریم ہلسا زموار آتا معلومداری ءِ کینہ، وزیر داخلہ ڈی جی پیمرا ءِ پارت کرے کہ الیکٹرانک میڈیا آ دا وڑ نا خبر تے مانیٹر کننگے و دافتا تالانی ءِ توننگے، دا سخت انگا وخت اٹ کل ادارہ و میڈیا کڑد ادا کیر، ننے کل ءِ اواری ٹی دا دَین انا مقابلہ ءِ کروئی ءِ۔ وزیر داخلہ اعجاز تینا کماشی ٹی 9 باسکی کمیٹی اس تشکیل تس وخت اس کہ ڈاکٹر فیصل سلطان بطور سینئر باسک انا وڑاٹ اوار کننگانے، داڑان بیدس وزارت داخلہ، ایف آئی اے، پی ٹی اے، پیمرا و این سی او سی نا نمائندہ غاک کمیٹی نا بشخ مریرہ۔ اسہ پین بیان اسے ٹی بنجائی وزیر داخلہ اعجاز شاہ قومی اسمبلی ءِ کیہی سوج آتا تحریری وڑاٹ ورندی ءِ ترسا پارینے کہ 2012 آن ہلیس داسہ دھرنا و برانز آتا سوب آن اقتصادی کہول آ ملکی خزانہ ءِ ایک ارب 50کروڑ71 لکھ97ہزار روپئی نا نسخان مسنے، 2013 ٹی اسلام آباد اٹ 3کروڑ 32 لکھ 81ہزار روپئی وخت اس کہ 2014 ٹی 75کروڑ59لکھ 79ہزار روپئی دھرنا و برانز آتیا مالی نسخان مسنے، ایلو کنڈ آ وزارت داخلہ قومی اسمبلی ءِ پارینے کہ نسخان تا اندازہ ءِ خلوئی ءِ۔ سوج اسے نا ورندی ٹی پارینے کہ ایف آئی اے وزارت اوورسیز آتا کمک اٹ جنسی سمگلنگ و جبری مشقت نا قلع قمع کن کاریم کننگ اٹی ءِ، سکھ یاتری تا ویزہ تا بابت ورندی ٹی پارینے کہ سکھ یاتری تے کرتار پور بیدس ویزہ آن موکل تسنے۔