بلوچستان اپوزیشن نا 17 اسمبلی باسک آ مقدمہ درج
Get real time updates directly on you device, subscribe now.
کوئٹہ: پولیس بلوچستان اسمبلی ٹی اپوزیشن نا 17 باسک انا برخلاف مقدمہ درج کرینے۔
اپوزیشن نا اسمبلی باسک آتا برخلاف مقدمہ بجلی روڈ پولیس اسٹیشن نا ایس ایچ او نا مدعیت اٹ درج کننگا۔
مقدمہ ٹی کار سرکار اٹ نیام تمنگ، کورونا ایس او پی تا خلاف ورزی و پولیس کارندہ غاتیا جلہو نا دفعہ غاک اووار کننگانو۔
مقدمہ نا ٹِک آتیٹی پاننگانے کہ جمعہ نا دے بجٹ دیوان نا وخت آ اپوزیشن باسک آک تینا مخ تف آتتون اوار اسمبلی گیٹ ءِ زور اٹ بند کریر، پولیس کارندہ غاتتون چک و تاڑ کریر۔ جلہو کریر، کارندہ غاتا وردی تے ارّار، دا وخت آ پنچ پولیس کارندہ ٹھپی مسر۔
حوال آتا رد اٹ پولیس واقعہ نا بابت جاست پاست نا بناءِ کرینے۔
ایلو کنڈ آ وزیر اعلیٰ بلوچستان و پولیس افسر آتا برخلاف مقدمہ درج کرفنگ کن اپوزیشن نا درخواست آتیا داسکان ہچ ءُ پیشرفت اس متنے۔