بلوچستان نا ویل آ خاص چکار کروئی تمک،، شہباز شریف

0

Get real time updates directly on you device, subscribe now.

اسلام آباد: وزیراعظم شہباز شریف پارینے کہ ننے تینا ردینک آتیان ہیل کرسا مونی ہنوئی تمک۔ پاکستان نا ہر چار آ صوبہ غاتیا، خاص وڑ اٹ بلوچستان نا ویل آ خاص چکار کروئی تمک۔ حکومت ءِ کبینی و بے روز گاری تون اوار بھلو چیلنج مون تروک ءُ، مسکوہی حکومت دافتا مون ءِ توننگ اٹ سرسہب متو۔ قوم انا فائدہ کن گچین ءُ فیصلہ کینہ، ننا سیوت جند انا فائدہ یا دوست بننگ بفننگ آتیان بالا تر ملک انا 22 کروڑ الس نا خذمت کن ءِ۔ پاکستان نا اولیکو کابینہ ءِ ہرا جھولو نا ودی کروک حکومت ءِ آئین و کانود نا کمک اٹ اینک کرسا جوڑ مسنے۔ چار شنبے نا دے بنجائی کابینہ نا اولیکو دیوان آن تران کرسا وزیر اعظم شہباز شریف پارے کہ تدوک آ پاوکم چار سال اٹی دا ملک اتون انت اس کہ مس اوڑا باور بفک۔ شوندار انگا ملک اٹی دا وڑ فسطائیت، سنگدلی و ظلم و ستم نا ہچ گمان مننگ کپک۔ مستین انت کہ مس، مس، داسہ ننے تینا ردینک آتیان ہیل کرسا مونی گام کروئی تمک۔ وزیراعظم شہباز شریف پارے کہ کابینہ نا کل باسک و آجو وڑ اٹ سرسہب مروک بروک آتے دا کابینہ ٹی اوار مننگ آ است انا ہُب اٹ مبارکبادی ایتوہ۔ او پارے کہ آزموندہ کار بندغ آک دا کابینہ ٹی اوار ءُ، ہرافتا بھلو قربانی ہم اریر۔ نم اسہ آئینی و کانودی وڑ اسے ٹی بے پتی تحریک نا سوب آن اللہ تعالیٰ نا فضل اٹ سرسہبی خنانرے، دا سیوت پاکستان نا تایخ نا بھاز بھلو سیوت اسے، ہرانا ستا ہم کننگ انگ ءِ، و اودے شیف ہم خلنگ انگ ءِ۔ دا سیوت ان شا اللہ جند انا فائدہ و دوست بننگ بفننگ آتیان ایڑتر پاکستان نا الس نا خذمت ءِ کیک۔ وزیراعظم پارے کہ ای دادے اسہ وڑ اسے نا جنگی کابینہ اس تکوہ، انتئے کہ نن غریبی، کبینی و کل خواری تتون جنگ کننگ اُن۔ ہرافتے تدوک آ حکومت چٹفنگ کتو۔ کنے اومیت کہ سلاہ سوج اٹ نن دا کاریم ءِ مونی دینہ۔ شہباز شریف پارے کہ کابینہ نا ٹہیفنگ اٹ ننے ہشت دہ دے لگا۔ ننے آ تنقید ہم کننگا، ولے الحمد اللہ دا کاریم پورو مس۔ اینو بھاز لائخ و آزموندہ کار ءُ کابینہ اس نن تون ارے۔ ننا مون آ لوڈشیڈنگ و ایندھن نا کاختی کون آ چیلنج آک سلوک ءُ، ہرافتیا بریفنگ تننگک، تاکہ نم کل راستکی تے مون آ تخسا دافتا ایسری کن فیصلہ اس کننگ کین۔ او پارے کہ پاکستان نا ہر چار آ صوبہ غاک، خاص وڑ اٹ بلوچستان نا ویل آتیا ننے خاص چکار کروئی تمک، و تینا مچ آ زور ءِ کاریم اٹ اتوئی تمک۔ چینی متل اسے کہ ہراڑے خواری مرے اوڑے وارخواہی ہم مریک۔ کنا ایمان ءِ کہ اگہ سِخت و است انا ہب اٹ کاریم کرین تو کل خواری تیان جپنگ کینہ۔ وزیراعظم پارے کہ دا پاکستان نا اولیکو کابینہ ءِ ہرا اسہ جھرلو نا ودی کروک حکومت اسے آئین و کانود نا رد اٹ اینک کرسا جوڑ مسنے۔ دا ملک وام تیٹی ڈبینگوک ءِ، ولے ننے دا ڈبینگوک آ کشتی ءِ کرک آ اتوئی ءِ۔ زرگزرانی ویل آک اریر کہ اریر، ولے ننے دا ملک ءِ دا ویل آتیان کشوئی ءِ۔ شہباز شریف پارے کہ ہراتم وخت بس نن سیاست ہم کینہ۔ ہراتم گچین کاری تا وخت بس تو تینا تینا منشور اٹ الس آ کانہ۔ ننے اسہ جان اِرا مرسا چیلنج آتے ایسر کروئی ءِ۔ داڑکن اخس کہ قربانی تسن، او کم مرور۔ داڑکن ننے سیوتءِ برجا تخوئی ءِ، زار آن پر انگا پروپیگنڈا تا راستکی نا کمک اٹ ورندی ءِ تروئی ءِ۔

(آن لائن)

Get real time updates directly on you device, subscribe now.

Leave A Reply

Your email address will not be published.