قومی اسمبلی، فرانسیسی سفیر ءِ کشنگ نا قرار داد پیش

اسلام آباد (آن لائن) قرار داد اٹ پاننگا کہ ایوان جھیڑہ ئی فرانسیسی میگزین چارلی ہیپڈو نا کنڈ آن یکم ستمبر 2020ء آ ناموس رسالتؐ نا گستاخی و توہینی خاکہ غاتا شینکاری نا مذمت ءِ کیک، فرانسیسی صدر نا کنڈ آن آجو سلاہ درشانی نا پن آ کروڑ آ مسلمان تا است آزاری ءِ کروک آتا است بڈی بھاز است ہسونی نا ہیت اسے۔ ایوان خواست کیک کہ فرانسیسی سفیر ءِ ملک آن کشنگ نا ویل آ شرہ کننگے۔ غٹ یورپی ملک آتے لس وڑ اٹ و فرانس ءِ خاص وڑ اٹ دا باندات معلومدار کننگے۔ غٹ مسلمان ملک آتتون جوانی اٹ ہیت کننگے، و دا ویل ءِ جم وڑ اٹ جہانی فورم آتیا چست کننگے۔ جہانی تعلقداری تا باندات آتے بایدے ریاست پک کے و فرد، پڑک یا جماعت اس دا رد اٹ سٹی غیر کانودی زور شاغنگ کپک۔ صوبائی حکومت آک غٹ ضلع غاتیٹی برانز کن جاگہ جتا کیر، کہ الس نا ہڑدے ئی زند اٹ اڑاند جوڑ مف۔دا وخت آ علی محمد خان پارے کہ دا قرار داد ءِ پرائیویٹ باسک انا وڑ اٹ اتنگانے، و حکومت داٹی ہچ ءُ دعویداری اس کتنے۔ سرجم حوال آتا رد اٹ قومی اسمبلی ٹی قرار داد پیش کننگ نا وخت آ اپوزیشن نا کنڈ آن برانز کننگا۔ قومی اسمبلی ٹی تاجدار ختم نبوت زندہ باد نا نعرہ غاک لگار۔ شاہد خاقان عباسی و اسپیکر اسمبلی ہم تین پہ تین بُک لگار۔ تین پہ تین ءِ زاو بد کریر۔ دا وخت آ مسکوہی وزیر اعظم شاہد خاقان عباسی شرہ ٹی بشخ ہلسا پارے کہ است ہسونی نا ہیت اسے کہ تحفظ ناموس رسالت نا باندات مچ آ پاکستان امنائی خننگک، ولے حکومت دادے ایوان اٹ جھیڑہ ئی کننگ اٹی ءِ۔ حکومت ءِ قرار داد اتوئی ئس تو اپوزیشن تون سلاہ سوج کروسس، کنا خواس تءِ کہ اسہ گھنٹہ اس تننگے، نن دادے خوانن داٹی انت اس کہ ودفوئی مس، اودے نما مون آ تخن۔ اسپیشل کمیٹی نا ہچ ءُ گرج اس اف، مچ آ ایوان نا کمیٹی مریک۔ مولانا اسعد محمودگپ و تران کرسا پارے کہ اسپیکر صاحب نا وڑ کنڈ ہلوک ءِ، دا گڑا حکومت نا دوٹی ءِ کہ اپوزیشن نا اواری اٹ قرار داد اس اتے، نزور قرارداد نا کمک اٹ قوم انا جوزہ غاتے لتاڑ کننگپ، اپوزیشن ءِ گوجالنگا تو گڑا دا پارلیمنٹ ءِ چلینگ کن الیپنہ۔ علی محمد خان پارے کہ حکومت و ٹی ایل پی نا مذاکرات نا بابت قرار داد اتنگانے، داٹی ہچ ءُ بدلی اس کننگتنے، باندات ءِ خصوصی کمیٹی آ گدریفنگے۔ احسن اقبال پارے کہ اینو بایدے دا قرار داد ءِ وزیر اعظم پیش کروسس، داڑے چَپی دا وڑ کننگا کہ وزیر اس ہم دا قرار داد ءِ پیش کتو۔ اسد عمر پارے کہ ای پک پاننگ کیوہ کہ ناموس رسالت نا جہانی کہول آ ہرا ایسر پیش تما اوٹی پاکستان عالم اسلام نا راہشونی ءِ کیک۔ وزیرمذہبی امور نورالحق قادری قومی اسمبلی ٹی گپ و تران کرسا پارے کہ دا قرارداد نا اسہ پس منظر اسے، اسہ جماعت اس سڑک آتیا پیش تما، بھاز آ جماعت آک اوفتتون تَفیر، نن دا جماعت نا موقف ءِ وار وار بنگن،اونا پاننگ ئس کہ نن خوانہ کہ دتر وہنگ نا جاگہ غا ویل ءِ ایوان اٹ ایسر کننگ کین۔ دا قرارداد دا ارادہ و سوچ انا پوروی ءِ، حضورؐ نا ناموس کن پین گام گیج، سیاسی و سفارتی کہول آ گام گیج کننگک۔دا وخت آ ہراتم وزیر مذہبی باندات ماڈل ٹاؤن واقعہ نا ہیت ءِ کرے تو ن لیگ نا باسک آک غوغا کریر، و اسپیکر ڈائس ءِ گھیڑ کریر۔ گڈ سر اٹ اسپیکر قومی اسمبلی پارے کہ دا بھاز حساس ءُ ہیت اسے، داڑا سیاست کننگپ۔ داسہ ہم قرار داد پیش مسنے، منظور متنے، کل اتون قرار داد نا بابت سلاہ سوج کننگک۔ اخیر اٹ دیوان ءِ جمعہ اسکان پد بٹنگا۔