انسداد اسمگلنگ آرڈیننس نا مسودہ جوڑ، 14 سال اسکان سزا نا سلاہ
اسلام آباد (آن لائن) وزارت کانود و انصاف انسداد اسمگلنگ آرڈیننس نا مسودہ ءِ تیار کرینے‘ ہرانا رد اٹ اسمگلر آتے 14سال اسکان قید انا سزا مننگ کیک۔ بنجائی وزیر کانود و انصاف بیرسٹر فروغ نسیم نا کماشی ٹی ٹیم انسداد اسمگلنگ آرڈیننس نا مسودہ ءِ تیار کرینے‘ مچ آ ملک اٹ اطلاق تے دمدستی مریک‘ آرڈیننس نا اطلاق درملکی کرنسی، خیسن‘ زر‘ بورہ‘ خولم‘ نُت‘ برنج‘ دال‘ پٹاٹہ‘ پیماز‘ کتخی آ تیل و لائیو اسٹاک آ مریک۔ مسودہ ٹی پاننگانے کہ کسٹمز، ایف بی آر وکانود نافذ کروک آادارہ غاک کارروائی کننگ کیرہ‘ تعلقدار ادارہ کارروائی کتو تو سیکرٹری کانود تون کارروائی کننگ ناواکداری مریک‘ داکان بیدس خصوصی عدالت آک زموار بندغ آتا سمری ٹرائل کیرہ‘ آرڈیننس نا رد اٹ اسمگلر آتا کمکار آتا برخلاف ہم کارروائی مننگ کیک‘ اسمگلر آتے بے وارنٹ آن ہم دزگیر کننگ مریک، اسمگلنگ کروک آ گڑاتے سرکار ضبط کیک‘ اسمگلنگ نا ڈہ تروک آ ءِ ریکوری نا 10 درسَد انعام تننگک۔