تفتان اٹ لاک ڈاﺅن آن زہمی خاہوت آتیکن راشن نا اسہ کنٹینر اس اسسٹنٹ کمشنر تفتان ءِ تننگا
تفتان (آن لائن) سیندک پراجیکٹ اٹ کاریم کروک کمپنی ایم سی سی و ایم آر ڈی ایل ناکنڈآن تفتان اٹ لاک ڈاﺅن آن زہمی خاہوت آتیکن راشن نا اسہ کنٹینر اس اسسٹنٹ کمشنر تفتان ءِ تننگا۔ حوال نارد اٹ مچ آ صوبہ غانبار تفتان اٹ ہم لاک ڈاﺅن آن دیہاڑی دار مزورکار آک بھاز زہمی مسنو‘ دا وخت اٹ سیندک پراجیکٹ اٹ کاریم کروک کمپنی ایم سی سی و ایم آر ڈی ایل ناکنڈآن تفتان نا غریب و دیہاڑی کروک مزورکار آتیکن راشن نا اسہ کنٹینر اس ایم آر ڈی ایل نا وائس پریذیڈنٹ حاجی خالد گل یوسفزئی اسسٹنٹ کمشنر تفتان محمد وارث ءِ تس۔ دا وخت آ رسالدار میجر سردار اکبر خان سنجرانی‘ نائب رسالدار درمحمد محمد حسنی ہم ساڑی ئس‘ کنٹینر اٹ 584 خاہوت کن اسہ تُو انا راشن ارے۔