سربندر فش لینڈنگ جیٹی آ مول ہولڈنگ نا نظام ماہی گیر تیکن ٹیکی اسے،مولانا ہدایت الرحمن

گوادر، صوبائی اسمبلی نا باسک گوادر مولانا ہدایت الرحمن و ڈائریکٹر جنرل گوادر ڈویلپمنٹ اتھارٹی معین الرحمن خان سربندر فش لینڈنگ جیٹی آ فش آکشن ہال و مول ہولڈرز سیکشن نا باقاعدہ بناءِ کریر، دا وخت آ ماہی گیر تا بھلو کچ اسے تون اوار چیف انجینئر جی ڈی اے حاجی سید محمد، سپرنٹنڈنگ انجینئر روڈز نادر بلوچ، پروجیکٹ ڈائریکٹر سربندر جیٹی حاجی حنیف حسین، ایگزیکٹو انجینئر قاسم بلوچ، یونین کونسل چیئرمین سربندر نصیب نوشیروانی، پنی آ پوریاگر و راجی شخصیت کہدہ حمید عصا و ایلو تعلقدار کمامدار و شخصیت آک ساڑی ئسر، دا وخت آ ایم پی اے گوادر مولانا ہدایت الرحمن و ڈائریکٹر جنرل جی ڈی اے معین الرحمن خان مول ہولڈرز آتے اوفتا الاٹمنٹ آرڈر آتے ہم تس‘ فش آکشن ہال و مول ہولڈنگ سیکشن بھلو وخت اسے آن غیر فعال ئسر، ہرافتے ڈائریکٹر جنرل جی ڈی اے معین الرحمن خان نا پارت آ تعلقدار بشخ فعال کرینے، داڑتون اوار فش آکشن نا باقاعدہ نظام نا بناءِ ہم کننگ انگ ءِ‘ دا گام انا مسخت سربندر نا ماہی گیر آتے گچین آسراتی فراوان کننگ، مچھی نا ہلنگ و بہا کننگ نا عمل ءِ منظم کننگ و ماہی گیری نا بشخ ءِ پین شون تننگ ءِ‘ بنائی دود آن تران کرسا ایم پی اے گوادر مولانا ہدایت الرحمن پارے کہ جی ڈی اے نا کنڈ آن سربندر فش لینڈنگ جیٹی آ مول ہولڈنگ نا نظام درستی راستی کرفنگ و فش آکشن ہال ءِ فعال کننگ سربندر نا ماہی گیر آتیکن اسہ اہم ءُ آسراتی و ٹیکی اسے‘ دا نظام آن ہندی کہول آ ماہی گیر تا شکار کروک مچھی نا ہلنگ و بہا کننگ و سپلائی چین نا عمل ءِ باضابطہ و منظم جوڑ کننگ اٹی کمک رسینگک‘ ہراڑان اوفتا زرگزرانی و واپاری سرجز آتیٹی ودکی مریک‘ او پارے کہ فش آکشن و مول ہولڈنگ نا نظام سربندر فش لینڈنگ جیٹی کن زرگزرانی سرجز و کٹیا ٹی ودکی نا سوب ہم مریک‘ داڑان ہندی کہول آ روزگار نا وارخواہی ودی مریک وخت اس کہ دوئی مروک کٹیاءِ جیٹی نا چاروکی، آپریشن و مینٹیننس آ ہم خڑچ کننگ مریک‘ ہراڑان دا اہم آسراتی ءِ گچین وڑ اٹ برجا تخنگ اٹی کمک رسینگک‘ ڈائریکٹر جنرل جی ڈی اے معین الرحمن خان پارے کہ فش آکشن ہال انا تفنگ کیہی سال مست پورو مسوسس، ولے منہ سوب آتا سوب آن دا فعال متویسس، اینو دا ہال ءِ فعال کننگ تون اوار فش آکشن نا باقاعدہ نظام نا ہم بنا کننگ انگ ءِ‘ او پارے کہ فش آکشن نا باقاعدہ نظام آن سربندر نا ماہی گیر آتے تینا شکار کروک مچھی نا گچین و کڑزوک نہاد نا دوئی کننگ اٹی کمک رسینگک‘ و مچھی نا ہلنگ و بہا کننگ نا عمل پین منظم و شفاف وڑ اٹ مستی کاہک۔