وزیراعلیٰ بلوچستان میر سرفراز بگٹی و چیئرمین بلاول بھٹو زرداری نا اوڑدہی، صوبہ نا جم حالیت آتیا گپ و تران

پاکستان پیپلزپارٹی نا چیئرمین بلاول بھٹو زرداری تون وزیراعلیٰ بلوچستان میر سرفراز بگٹی زرداری ہاؤس اسلام آباد اٹی اوڑدہی کرے، ہراٹی بلوچستان نا جم سیاسی، انتظامی و امن و امان نا حالیت آتیا خوڑتی اٹ تبادلہ خیال کننگا۔ اوڑدہی نا وخت آ وزیراعلیٰ بلوچستان میر سرفراز بگٹی چیئرمین بلاول بھٹو زرداری ءِ صوبہ نا ساڑی آ انتظامی و سیاسی حالیت و دہشت گردی نا داسدری واقعہ غاتا رِد اٹ حکومتی گام گیج آتیان آگاہ کرے۔ وزیراعلیٰ بریفنگ ترسا پارے کہ سانحہ زیارت نا زہمی خاہوت آتا دلجوئی و اوفتا روا انگا خواست آتا پوروی کن حکومت پبی آ گام گیج کرینے۔ وخت اس کہ پدخاہوت نا خواست آ سانحہ نا جاست پاست کن جوڈیشل کمیشن ہم قائم کننگانے تانکہ راستی مون آ برے۔وزیراعلیٰ مستی پارے کہ بلوچستان اٹی مدامگی امن نا قیام و سیاسی ہم گرنچی نا شون کن زُوت آل پارٹیز کانفرنس اڈ تننگ مرو, ہراٹی پارلیمان نا تہہ نا سیاسی جماعت آتون اوار پارلیمان آن پیشن نا سیاسی جماعت آتے ہم بشخ ہلنگ نا بٹنگک تانکہ دہشت گردی و امن و سوگوی نا بابت اسیجائی سُج پام اس جوڑ کنگے۔ دا موقع آ پاکستان پیپلزپارٹی نا چیئرمین بلاول بھٹو زرداری دہشت گردی نا داسدری لہر اٹی شہید مروک آ پاک فوج، ایف سی و پولیس نا ورنا تے خراجِ تحسین پیش کرسا پارے کہ دہشت گردی نا داسدری سانحہ غاتیٹی شہید مروک آ بندغ آتا پدخاہوت نا ڈکھ و ارمان ءِ محسوس کیوہ و اوفتا غم اٹی بریبر نا شریک اُٹ۔