گچین کاری کن فنڈ اف، الیکشن کمیشن نا رپورٹ جمع
الیکشن کمیشن نا کنڈ آن سپریم کورٹ اٹ رپورٹ ءِ رجسٹرار آفس سپریم کورٹ اٹی جمع کننگانے
اسلام آباد : سپریم کورٹ نا کنڈآن پنجاب اٹ گچین کاری تیکن فنڈ تننگ نا ارٹمیکو تروک ڈیڈ لائن ہم چٹا‘ الیکشن کمیشن آف پاکستان ءِ فنڈ تننگ متو‘ سَے شنبے نادے الیکشن کمیشن آف پاکستان نا کنڈآن رجسٹرار آفس سپریم کورٹ ءِ جمع کرفوک رپورٹ اٹ فنڈ داسکان تفننگ نا بابت معلومداری تننگانے۔ سے شنبے نا دے اسٹیٹ بنک کمامدار و وزارت خزانہ ناکنڈآن ہم فنڈ جاری کپننگ نابابت سربمہر رپورٹ ءِ رجسٹرار آفس سپریم کورٹ اٹ جمع کرفنگا۔ سپریم کورٹ آف پاکستان تیا تدوک آ پرمان اٹ وزارت خزانہ و اسٹیٹ بنک ءِ 17 اپریل اسکان پنجاب و خیبر پختونخواہ گچین کاری تیکن الیکشن کمیشن آف پاکستان ءِ 21 ارب روپئی جاری کننگ ءِ پک کرسا 18 اپریل آ داڑا پیش رفت رپورٹ جمع کرفنگ نا پرمان کننگانے‘ ہرانا رد اٹ ادارہ غاتا کنڈآن رپورٹ آتے عدالت عظمی ٹی جمع کرفنگانے‘ حوالی نا رد اٹ الیکشن کمیشن آف پاکستان تینا رپورٹ اٹ پارینے کہ گچین کاری تیکن فنڈ داسکان رسینگ تنے۔ اسٹیٹ بینک ناکنڈآن پیسہ تننگتو وخت اس کہ اسٹیٹ بنک و وزارت خزانہ تینا رپورٹ اٹ پیسہ تفننگ نا سوب آتے پارینے۔یات سلے کہ رجسٹرار آفس سپریم ءِ ادارہ غاتا کنڈآن جمع کرفوک رپورٹ آتے چیف جسٹس آف پاکستان تون اوار بنچ وایلو اِراشرفمند باسک جج آتے چیمبر اٹ پیش کروئی ءِ۔ ہراکان گڈ چیف جسٹس آف پاکستان باندات نا اہمیت و عدالت نا کمک نا رد اٹ وخت اس ہم دوارہ سماعت کن پن کننگ کیک۔
(آن لائن)