عمان آبنائے ہرمز اٹی امریکی کوشست آتیٹی نیام تما تو پبی بمباری کینہ ایا تے، ر ڈونلڈ ٹرمپ
امریکہ تون داسہ ہم سلہہ غاتا بھلو کوڑی اس ساڑی ارے، ایران تون برجا جھیڑہ ءِ چٹفنگ کن اشتافی افٹ
Get real time updates directly on you device, subscribe now.
واشنگٹن، امریکی صدر ڈونلڈ ٹرمپ آبنائے ہرمز نا باندات آ عمان ءِ دھڑکو ترسا امریکی میڈیا فاکس نیوز ءِ انٹرویو ترسا پارینے کہ اگہ آبنائے ہرمز ءِ ملنگ نا کوشست آتیٹی عمان اڑاند جوڑ مس تو اودے بھاز بد وڑاٹ بمباری اٹ شست کینہ۔ صدر ٹرمپ پارے کہ امریکہ تون داسہ ہم سلہہ غاتا بھلو کوڑی اس ارے‘ اخس سلہہ داسکان امریکہ کاریم اٹ ایسنے او اف آن حساب ئسر‘امریکہ تون نیامی کہول انا بھاز سلہہ ساڑی ءُ۔ امریکی صدر دا ہم پارے کہ داسہ ایران پیہن بیرک چست کرسا کاٹم شیف کننگ نا پڑو ءِ کے، ٹرمپ پارے کہ اودے ایران تون برجا چک وتاڑ ءِ چٹفنگ کن ہچ ءُ اشتافی اس اف، اونا انتظامیہ ایران نا پاسداران انقلاب تون دراست حوال کن اسہ بیک چینل اس پک کرینے۔ ایران تدوک آ ہفتہ پاریسس کہ او آبنائے ہرمز ءِ دوارہ ملنگ نا باندات آ عمان تون ہیت و گپ کننگ اٹی ءِ‘ ہڑتوم آ ملک آتا نیام اٹی واپاری جہاز آتا ہن و بر ءِ بحال کننگ کن گمانی معاہدہ غا پیش رفت نا حوال آک ہم مون آ بسنو۔ امریکی اخبار نا رِد اٹ جون نا نیام اٹی اسلام آباد ایم او یو آ دستخط آن پد ایران نا سخت گیر سرکڑدہ غاک تدوک آ اِرا تُو اسکان اسہ بھلو جنگ اسے نا تیاری ٹی وخت گدریفیر۔ امریکی اخبار وال اسٹریٹ جنرل نا رپورٹ نا رِد اٹ دا تیاری نا رد اٹ پاسداران انقلاب ءِ ملک انا باقاعدہ فوج انا پین کنٹرول تننگاسس و اہم آ عہدہ غاتیا عراق جنگ انا آزموندہ کار و مستین نا داخلی کریک ڈاؤن تیٹی اوار فوجی افسر آتے پندار کننگا۔ ہنداوڑ داخلی انٹیلی جنس تور آپریشن تے ودفنگا و میزائل و ڈرون تا پیداوار اٹی ترندی اتنگا، داڑتون اوار ایرانی فوج سخت گام ہرفسا آبنائے ہرمز آ ایران نا کوزہ ءِ سوگو کننگ کن بحری جہاز آتیا جلہو کرے و جنگ انا دنگ ءِ بحیرہ احمر اسکان تالان کرے۔ امریکی کمامدار آتا رِد اٹ عرب انٹیلی جنس کمامدار آتے داوڑ انا شاہدی رسینگتنے ہرافتے ٹی پیدوار ءِ کہ ایران نا سخت گیر سرکڑدہ غاک جنگ ءِ ودفنگ و امریکہ کن خواری تے ودفنگ نا سُج پام آ کاریم کننگ اٹی ءُ۔ دا حالیت خلیجی ملک کویت ءِ گڑتی ٹی شاغانے انتئے کہ ایرانی راہشونک ترندی اٹ دشمن نا ڈغار آ جلہو کروک کارروائی تا ہیت ءِ کننگ اٹی ءُ و اوفتا کل آن بھلا مسخت دشمن ءِ سخت نسخان رسیفنگ ءِ تاکہ دا ہیت ءِ پک کننگے کہ ایران تدوک آ سال 12 دے ئی جنگ و ساڑی چک وتاڑ اٹ ہرا جلہو آتے مون تروئی تما او دوارہ مفس۔ ایرانی حکومت نا خڑک تکنگوک دفاعی چاہندار محمد حسن سنگتراش نا رِد اٹ ایران اٹی دا نظریہ لس ءِ کہ اصل جنگ داسکان بنا کتوٹ۔ اومستی پارے کہ ہ داسکان ہرا گڑا خننگانے او کچ اٹ و ریسہ اٹ چک وتاڑ ءِ ہرانا مسخت ہچ ءُ بھلو جلہو اسے آن مست دشمن نا لائخی تے نزور کننگ ءِ۔ امریکی اخبار نا رپورٹ اٹی دا ہم پاننگا کہ اسرائیلی کمامدار آک گڑتی درشان کرینو کہ تے ایران اومیت آتیان ہم زیات ترندی اٹ تینا انفراسٹرکچر نا ودفنگ و میزائل اڈہ غاتسکان رسینگ ءِ بحال کننگ اٹی ءِ‘ ایران امریکی اڈہ غاتے ہم سرسہبی اٹ شست کرینے و اوڑتون بحری جہاز و خلیج اٹی توانائی نا انفراسٹرکچر ءِ خلیس اٹی شاغنگ کن پورو فائر پاور ساڑی ءِ۔ امریکی اخبار نا رِد اٹ راستی ٹی ایران ارا وڑ انا پالیسی آ کاریم کننگ ئس ہراڑے اسہ کنڈ آ اونا سفارتکار امریکہ تون امن معاہدہ نا کوشست اٹی ئسر تو ایلو کنڈ آ ایرانی سپریم لیڈر مجتبیٰ خامنہ ای سیکورٹی ادارہ غاتے اسہ بھلو جنگ اسے کن تیار کننگ نا گام گیج کریکہ ہرانا بناءِ گمانی وڑاٹ تہران تینٹ کننگ کیک۔