گچین کاریک 90 دے ٹی مفسہ، حلقہ بندی شیڈول نا پڑو

اسلام آباد: لس گچین کاریک 90دے اٹ مننگ کپسہ‘ الیکشن کمیشن بروک آلس گچین کاری تیکن پوسکن حلقہ بندی کرفنگ نا شیڈول جاری کرینے‘ حلقہ بندی تا بنا اینو 18اگست جمعہ غان مریک‘ وخت اس کہ پک لڑ 14دسمبر آ جاری مریک‘ الیکشن کمیشن ناکنڈآن جاری مروک اعلامیہ نا رد اٹ الیکشن کمیشن داسہ نا ڈیجیٹل مردم شماری 2023 نا سرکاری شینک مروک نتیجہ غاتا رد اٹ پوسکن حلقہ بندی کننگ نافیصلہ کرینے و دا رد اٹ شیڈول نا نوٹیفکیشن ہم جاری کرینے‘ شیڈول نا رد اٹ اینو 18اگست جمعہ نا دے آن مچ آ ملک انا انتظامی یونٹ آتا باؤنڈری تے منجمد کننگک21اگست آ ہر چار آصوبہ و بنجائی دارالحکومت نا حلقہ بندی کمیٹی تا سلابتی دیوان مریک‘ 22اگست آن 31اگست اسکان صوبائی حکومت آتیان ضلع و تحصیل نا نقشہ وایلو ڈیٹا تے ہلنگک وخت اس کہ ادارہ شماریات آن مردم شماری نا ڈیٹا ءِ بٹنگ انگک۔ 1ستمبر آن 4ستمبر اسکان حلقہ بندی کروک کمیٹی تا ٹریننگ مریک‘ 5ستمبر آن 7ستمبر اسکان حلقہ بندی کمیٹی تے ضلعی کہول آ قومی و صوبائی اسمبلی تا نشست آتا کچ ءِ تننگک۔ 8ستمبر آن 7 اکتوبر اسکان حلقہ بندی تا بنائی لڑ شینک کننگک۔ 10اکتوبر آن 8نومبر اسکان بنائی حلقہ بندی تیا اعتراض آتے چیف الیکشن کمشنر نامون آپیش کننگک‘ دا اعتراض آتیا 11نومبر آن 9دسمبر اسکان فیصلہ بنفنگک و 14دسمبر آ حلقہ بندی تاپک لڑ شینک کننگک۔الیکشن کمیشن نا رد اٹ حلقہ بندی تیا صوبائی حکومت و ادارہ شماریات آن کمکار خواہسونن و دا رد اٹ المی پرمان ہم جاری کننگانے۔ایلو کنڈ آ الیکشن کمیشن غٹ سیاسی جماعت آتا سروک آتے الیکشن ایکٹ 2017نا دفعہ 204 و 210 و الیکشن رولز 2017 نا قاعدہ 159 و 160 نا رداٹ یات دہانی کرفینے کہ اوفتے جون 2023اٹی چٹوک آ مالی سال 2022-23کن تینا اکاؤنٹ آتا مربوط گوشوارہ غاتے الیکشن کمیشن اٹ 29 اگست 2023 یا داکان مست جمع کرفوئی مریک۔ کمیشن نا ترجمان ناکنڈآن جاری پریس ریلیز نا رداٹ الیکشن ایکٹ 2017 نا دفعہ 210 نا رداٹ سیاسی جماعت اس مالی سال انا ایسر نا 60 دے انا تہہ ٹی کمیشن ءِ تینا گوشوارہ فارم ڈی آ چارٹرڈ اکاؤنٹنٹ نا کمک اٹ درج ذیل سرجم آتون پیش کیک۔ سالانہ کٹیا و خڑچ، فنڈنگ نا ذریعہ و میرات و واجبات، الیکشن کمیشن ءِ پیش کروک آ سرجم سیاسی جماعت نا آڈٹ رپورٹ ہرا چارٹرڈ اکاؤنٹنٹ نا کنڈآن جاری کننگے و پارٹی سروک نا کنڈآن مجاز عہدیدار آتیان دستخط شدہ مرے ہراٹی داہیت ءِ پک کننگے کہ الیکشن ایکٹ 2017 نا رداٹ ممنوعہ ذریعہ اٹ پارٹی ءِ ہچ ءُ فنڈ اس ملتنے۔ گوشوارہ غاتیٹی پارٹی نا مالی حالیت نا بابت سہی معلومداری موجود ءِ۔ ہندا بڑزکو سرجم آک زیر دستخطی/مجاز عہدیدار آتا علم و یقین نا رداٹ راست ءُ۔ گوشوارہ غاتا منسلک کروک سرجم آتے رپورٹ چارٹرڈ اکاؤنٹنٹ نا کنڈآن آڈٹ شدہءُ۔ گوشوارہ غاتا سرجم آتے الیکشن ایکٹ 2017نا رداٹ فارم ڈی آ جمع کرفنگک۔ پرنٹ مروک فارم الیکشن کمیشن سیکرٹریٹ اسلام آباد و صوبائی الیکشن کمشنرز، پنجاب، سندھ، خیبرپختونخواو بلوچستان نا دفترآتیٹی مفت دستیاب ءِ، فنڈ آتا ذرائع کن فارم ڈی پرفارماہم ای سی پی نا ویب سائٹ آ دستیاب ءِ۔ فارم اٹی اووررائٹنگ قابل قبول اف۔ آڈیٹر نا بابت آئی سی اے پی نا کنڈآن جاری کروک رکنیت/سرٹیفکیٹ ءِ آخیریکو درست تجدیدی سرٹیفکیٹ تون فارم ڈی ٹی اوار کننگے۔

(آن لائن/ اے پی پی)