کشارگر تا نیام اٹ انصاف اٹ دیر بشخنگ ءِ پک کننگک، عابد سلیم قریشی

نصیرآباد (خ ن) کشاری ڈغار تا بریبری ٹی بشخ و پانٹ و دوئی مروک آ ویل آتا پوروی کن کمشنر نصیرآباد عابد سلیم قریشی نا کماشی ٹی دیوان اس اڈ ہلک ہراٹی چیف انجنیئر کینالز شیر اوغان ایس ای ایریگیشن ریاض بلوچ ایکسین پٹ فیڈر کینال نثار احمد مغیری اسک بشخ ہلکر، ایکسین نثار احمد مغیری دیوان ءِ کشاری ڈغار نا بشخ و پانٹ نا بابت اٹ بریفنگ ترسا پارینے کہ انتظامیہ نا کمک اٹ کشارگر تے اسہ کچ انا کشاری ڈغار تننگ برجا ءِ، پٹ فیڈر کینال نا کل شاخ آتیٹی دا وخت آ کشاری ڈغار تننگ وارہ بندی نا رداٹ برجا ءِ، گرج انا وخت آ کشاری دیر تا تننگ آن دا وار جوان فصل دوئی کننگ نا جوان ءُ گمان اس ارے انتئے کہ تدوک آ سال تیان دا وار بوائی نا ماس آ ٹیل انا کشارگر تے ڈیر تننگ ءِ ممکن جوڑ کننگانے، دیوان آن تران کرسا کمشنر نصیرآباد عابد سلیم قریشی پارینے کہ انتظامیہ محکمہ ایریگیشن تون ہروڑ نا کمک کننگ ءِ پک کننگ اٹی ءِ، ننا ہندا کوشست مرے کہ نن تہہ انا ہر بشخ ءِ آباد کرفن تاکہ لکھ آ میٹرک کشاری گڑا دوئی کننگ کین او پارینے کہ محکمہ ایریگیشن نا بڑزکو افسرک دیر انا بشخ و پانٹ انا کاریم نا تینٹ نگرانی ءِ کیر و دیر دزوک آتا برخلاف جوان وڑاٹ کارروائی کننگے او پارینے کہ دِیر دز ٹی اگہ محکمہ ایریگیشن نا ملازم اس اختہ خننگا تو اونا برخلاف ہم ایکشن ہلنگے و محکمانہ کارروائی آ عمل کرسا انصاف نا خواست آتے پورو کننگے نن ہچ ءُ دِیر دز اسے سگپنہ۔ او پارینے کہ مروک آ کارروائی نا مسخت ہم ہندا ئس کہ ٹیل اسکان نا کشارگر تے اوفتا بشخ انا دِیر رسینگے تانکہ اوفتا ڈغارک ہم وخت انا رداٹ آباد مننگ کیر، اوکان گڈ چیف انجینئر کینالز شیر اوغان ایس ای ریاض بلوچ و ایکسیئن پٹ فیڈر کینال نثار احمد مغیری مروک آ پِر تیٹی جتا جتا کنال و اوفتا شاخ تا جاچ ءِ ہلکر۔