بلوچستان بجٹ دیوان، اپوزیشن نا برانز، اسمبلی نا درگہ ءِ کلف کریر، بکتر بند گاڈی پرغا تے، اپوزیشن نا باسک آک ٹھپی

کوئٹہ (اے پی پی) بلوچستان اسمبلی ٹی بجٹ دیوان اپوزیشن نا ترند برانز نا سوب آن ہرے مس، اپوزیشن باسک آک صوبائی اسمبلی نا ہرچار آ پترینگ انگ نا درگہ غاتے کلف کریسر، ہراڑان صوبائی اسمبلی نا باسک آک صحافی و اسمبلی آ ہنوک آ غٹ بندغ آک پیشن سلیسر، انتظامی و پولیس آفیسر آتا وار وار آ درخواست آتیان پد ہم درگہ غاتے ملپننگ آ پولیس بکتر بند گاڈی نا کمک اٹ اسمبلی نا اسہ درگہ اس پرغا ہراٹی اپوزیشن نا اِراباسک عبدالواحد صدیقی و بابو رحیم ٹھپی مسر، ہنداوخت آ وزیراعلیٰ بلوچستان جام کمال خان و صوبائی وزیر آک سخت سیکورٹی ٹی ریڈزون نا کسر اسمبلی آ سرمسر وزیراعلیٰ نا اسمبلی آ سرمننگ تون اپوزیشن نا برانز اٹ ترندی بس و صوبائی حکومت نا برخلاف نعرہ خلنگ تون اوار اوار اسمبلی نا پیشن نا شیشہ و گملہ غاتے پرغنگا ہراڑا پولیس لاٹھی چارج کرے و مچی کروک آتے منتشر کننگ کن آنسو گیس ءِ ہم کاریم اٹ ایس اپوزیشن لیڈر ملک سکندر حیات ایڈووکیٹ پارے کہ حکومت بجٹ نا بابت ننے پت اٹ ہلتنے و من منشائی کرے چاردے آن برجا ننا برانز ءِ سنجیدہ ہلنگتو و اینو مجبورا ننے گیٹ ءِ بند کرسا برانز کروئی تما