قومی اسمبلی الیکشن کمیشن ءِ فنڈ تفننگ نا سلاہ منظور

اسلام آباد : قومی اسمبلی سپریم کورٹ نا پرمان آ اسٹیٹ بینک ءِ گچین کاری کن فنڈ جاری کننگ نا قائمہ کمیٹی نا سلاہ ءِ منظور کریقومی اسمبلی نا دیوان اسپیکر راجہ پرویز اشرف نا کماشی ٹی مس، ہراتی قائمہ کمیٹی خزانہ نا رپورٹ پیش کننگا، و قومی اسمبلی اسہ وار ولدا الیکشن کمیشن ءِ فنڈ تفننگ نا سلاہ ءِ منظورکرے۔ایلو کنڈآ بنجائی کابینہ پنجاب اٹ گچین کاری تیکن الیکشن کمیشن ءِ اسٹیٹ بینک ناکنڈآن برائے راست فنڈ تننگ نا تورینے و دا باندات ءِ قومی اسمبلی ٹی دننگ نا فیصلہ کرینے ہراڑے حکومت ضمنی گرانٹ کن مالیاتی بل پیش کیک۔ بنجائی کابینہ نا خصوصی دیوان وزیراعظم شہباز شریف ناکماشی ٹی دوشنبے نادے پارلیمنٹ ہاؤس اٹ اڈہلک دیوان اٹ بنجائی وزیر مذہبی امور مفتی عبدالشکور نا روح انا ایصال وثواب کن مغفرت و دعا پاتیہ کننگا، وزیراعظم مفتی عبدالشکور نا خذمت آتے خراج عقیدت پیش کرے وپارے کہ او اسہ سادہ طب و درویش منش گچین ءُ انسان اس ئس‘ اونا کمتی بھاز محسوس کینہ۔ داکان گڈ وزیر مملکت خزانہ عائشہ غوث پاشا دیوان ءِ قائمہ کمیٹی خزانہ نا کارروائی نا بابت معلومدار کرے و پارے کہ قائمہ کمیٹی باندات ءِ کابینہ و قومی اسمبلی ءِ تسنے و قائمہ کمیٹی گوندانے کہ اسٹیٹ بینک برائے راست خڑچ کننگ کپک۔ وزیرکانود اعظم نذیر تارڑ دیوان ءِ پارے کہ سپریم کورٹ اسٹیٹ بینک ءِ 21 ارب جاری کننگ ناپاریسس۔ سٹیٹ بینک انا کاریم دا اف کہ او پیسہ ایتے‘ دا حق وزارت خزانہ و قومی اسمبلی ناءِ۔ ہراکان گڈ کابینہ برائے راست مرکزی بینک ءِ فنڈ تننگ آن تورینے و عائشہ غوث پاشا ءِ پارت کرینے کہ او گچین کاری خڑچ آتیکن ضمنی گرانٹ نا بل ءِ ایوان اٹ پیش کے‘ ایوان دا بابت انت کہ فیصلہ کرے داڑان سپریم کورٹ ءِ معلومدار کننگک۔ وزیراعظم محمد شہباز شریف ناکماشی ٹی بنجائی کابینہ نا دیوان تدوک آدے اسلام آباد اٹ اڈہلک‘ دیوان اٹ بنجائی وزیر مذہبی امور مفتی عبدالشکور نا کار شکست اٹ کزیت کننگ آارمان کننگا و اوڑکن دعا پاتیہ کننگا‘ دیوان اٹ تران کرسا وزیراعظم پارے کہ ایماندار مفتی عبدالشکور دینی وسیاسی خذمت کرینے۔ او پارے کہ مفتی صاحب اسہ جید عالم باعمل ءُ مسلمان و بے کچ علم والا شخصیت اس ئس۔ اوپارے کہ کابینہ ٹی تینا اسہ سال انا چنکا وخت اٹ او ننے کل ءِ تینے آن بھاز خڑ کرے۔ ایماندار ہرا مستعدی‘ خواری‘ استخواہی اٹ حج آپریشن ءِ سر تس ہراکہ ستا کڑزک۔ وزیراعظم پارے کہ سیاسی لحاظ اٹ او تینا جماعت جے یو آئی (ف) نا پیشانی آ جرکاکہ۔ او مستی پارے کہ ایماندار مفتی صاحب نا سنگت آک اونا عاجزی و نیک نیتی نا گواہی تننگ اٹی ءُ۔

(مانیٹرنگ ڈیسک/آن لائن)