عمران خان پی ڈی ایم آن این آر او نا خواہندار

اسلام آباد/ ملتان : پی ڈی ایم ءِ این آر او تفننگ نا وار وار پاروک آ عمران خان تینٹ پی ڈی ایم نا حکومت آن این آر او نا خواہندار ءِ و جماعت اسلامی نا کمک اٹ مذاکرات کن پیشگی شڑت تخا ہرافتے حکومت مسترد کرے وپیدوار کرے کہ ہرا ہیت مس مذاکرات نا میز آ مریک‘ ومہالو نا شڑت آتیا ہیت کروئی ءِ تو دا وڑ انا مذاکرات نا ہچ فائدہ اف‘ حکومتی حوالی نا رد اٹ تحریک انصاف و حکومت اٹ مذاکرات نا باندات آ تحریک انصاف این آر او خواہسنے۔ اپوزیشن لیڈر نا عہدہ و عمران خان نا برخلاف کل کیس تے چٹفنگ نا شڑت تخانے‘ حوالی نا رد ات تحریک انصاف براہ راست مذاکرات کن شڑت تخانے‘ مہالو شڑت آتے ٹی پاننگانے کہ حکومت اپوزیشن لیڈر نا عہدہ ءِ تحریک انصاف ءِ ایتے‘ ننا قومی اسمبلی نا کل باسک آتا استیفہ غاتے نامنظور کننگے‘ تحریک انصاف نا کل دزگیر راہشون و کارندہ غاتا برخلاف مقدمہ غاتے پدی ہلنگے‘ عمران خان نا برخلاف ہم کل کیس تے چٹفنگے۔ حوالی نا رد اٹ تحریک انصاف دا خواست آتے جماعت اسلامی نا ڈل اتون اوڑدہی نا وخت آ پیش کرے۔ ایلو کنڈآ حکومت مذاکرات آن مست ہچ ءُ مہالو شڑت اس منپننگ نافیصلہ کرینے۔ حکومتی حوالی نا رد اٹ انت کہ ہیت مریک مذاکرات نا میز آ مریک۔ حکومت پیدوار موقف تینائی کرینے کہ مہالو نا شڑت آتیا مذاکرات کروئی ءِ تو ہچ فائدہ اف۔ دا رد اٹ پاکستان تحریک انصاف نا وائس چیئرمین شاہ محمود قریشی پارینے کہ نن وخت اس ہم مذاکرات آن نمن متنن۔ خیبر پختونخوا و پنجاب نافیصلہ آئینی وڑ اناءِ‘ مذاکرات آئین نا فریم ورک اٹ مریک۔90 دے اٹ گچین کاری کرفنگ آئین نا ٹک اسے‘ داڑا نن ہچ ءُ لچک اس نشان تننگ کپنہ۔ ملتان اٹ میڈیا تون ہیت وگپ کرسا شاہ محمود قریشی پارے کہ نن سیاسی ءُ بندغ ان‘ سیاسی بندغ آک ہیت وگپ کیرہ‘ سیاسی جماعت وخت اس ہم مذاکرات آن تینے چَپ تفک۔ مذاکرات نا دنگ آک مریرہ‘ نن مدام پارینن کہ مذاکرات کننگ کن تیار ان۔ شاہ محمود قریشی پارے کہ مذاکرات آئین نا دنگ اٹ مریک‘ آئین آن چَپ مننگ کپک۔ 90 دے اٹ گچین کاری کرفنگ آئین نا ٹک اسے‘ دا ڑا نن ہچ لچک نشان تننگ کپنہ او تو آئین نا چپ مریک۔ بلوچستان، سندھ و قومی اسمبلی نا باندات آ اوار تولسا ہیت کننگ کینہ کہ اوفتے ہرا وخت آ چٹفنگے‘ اسہ دے آ گچین کاریک مریر داڑا ہیت مننگ کیک۔ سراج الحق ہم ہندا خواہک کہ ملک انا ہرا حالیت آک داڑان پیش تمنگ کن مذاکرات کننگے۔ پی ٹی آئی نا وائس چیئرمین پارے کہ پی ڈی ایم اول اٹ تینا صف آتے درست کے نن 14 مئی ءِ است آن دننگ کپنہ‘ 14مئی آئین نا شڑت ءِ‘ سپریم کورٹ نا فیصلہ ءِ‘ ننے وکیل آتتون سلاہ کروئی مریک۔ 73درسَد الس خواہک کہ ملک ءِ دا مین آن کشنگ کن دمدستی گچین کاری کرفنگے‘ آئین آ لچک امر نشان تننگ کینہ‘ اِرا تہائی گیشتری ارے تو آئین اٹ ترمیم کیر‘ آئین ءِ امنا کننگے‘ داٹی جھیڑہ انت اناءِ۔؟ دافک انتئے گچین کاری تیان نرنگ خوارہ‘ انتئے آئین آن مون ءِ ہڑسنگ خوارہ؟ او پارے کہ ٹائمنگ آصف زرداری نا چوائس آ مفک‘ ٹائمنگ آئین نا وڑ اٹ مریک‘ کنا استخواہی آ تو کل گڑاک مننگ کپسہ‘ کانود نا پابند اٹ۔

(آن لائن)