کورونا غان اسہ دے ٹی 149 مرک، اسکول آک بند

اسلام آباد(آن لائن) کورونا نا سوب آن اسہ دے ٹی 149 بندغ زوال مسنو، وخت اس کہ 6 ہزار آن زیات مثبت کیس رپورٹ مسنو، نیشنل کمانڈ اینڈ آپریشن سینٹر نا کنڈ آن جاری کروک حساب نا رد اٹ تدوک آ 24 گھنٹہ ٹی 71 ہزار 836 کورونا ٹیسٹ کننگار، ہراڑان پدداسہ جم کووڈ 19 ٹیسٹ آتا کچ 11,144,367 مسنے، تدوک آ 24 گھنٹہ ٹی مچ آ ملک اٹی 6 ہزار 127 پوسکن ءُ مثبت کیس رپورٹ مسنو، دا وڑ پاکستان اٹی کورونا نا پک ناجوڑ آتا کچ 756,285 مسنے۔ سرکاری حساب آتا رد اٹ داتم اسکان سندھ اٹی 2 لکھ72 ہزار 197، پنجاب اٹی 2 لکھ 67 ہزار 572، خیبر پختونخوا ٹی اسہ لکھ 5 ہزار 438، اسلام آباد اٹی 69 ہزار 556، بلوچستان اٹی 20 ہزار 822، آزاد کشمیر اٹی 15 ہزار 524 و گلگت بلتستان اٹی 5 ہزار 176 بندغ ءِ کورونا مسنے۔ سرکاری حساب آتا رد اٹ دا وخت اسکان مچ آ ملک اٹی کورونا نا فعال ناجوڑ آتا کچ 80 ہزار 243 ءِ، وخت اس کہ 4 ہزار آن زیات ناجوڑ نازرک پاننگرہ۔ تدوک آ 24 گھنٹہ ٹی مچ آ ملک اٹی کورونا غان 149 پوسکن ءُ مرک مسنو۔ ہراڑان پد دا دین آن زوال مروک آتا کچ جم وڑ اٹ 16 ہزار 243 مسنے۔ این سی او سی نا رداٹ کورونا غان اسہ دے ٹی 4 ہزار 527 ناجوڑ دراخ جوڑ مسنو۔ و دراخ جوڑ مروک آتا کچ 659,483 مسنے۔ ایلو کنڈ آ لاہور اٹی کورونا نا ودوک آ کیس آتا سوب آن ہسپتال آتا آئی سی یوک پر مسنو۔ سرکاری حساب آتا رد اٹ ہسپتال آتا 92 درسَد آن زیات آئی سی یو بیڈ آتیا ناجوڑ آک درمان مننگ ءُ۔ شار انا 92.90 درسَد آئی سی یو بیڈ آتیا ناجوڑ آک درمان مننگ ءُ۔ ہائی ڈیپینڈینسی یونٹ آتا آکوپینسی ریٹ ہم 90 درسَد اسکان سر مسنے۔ شار انا سرکاری و نجی ہسپتال آتیٹی باریم 12055 ناجوڑ درمان مننگ ءُ۔ حساب آتا رد اٹ سرکاری ہسپتال آتیٹی 817 و نجی ہسپتال آتیٹی 438 ناجوڑ درمان مننگ ءُ۔ شار اٹی بھاز نازرک حالیت نا 239 ناجوڑ ءِ وینٹی لیٹر آتیا تخنگانے، نازرک حالیت نا 675 مریض ہائی ڈیپینڈینسی یونٹ آتیٹی درمان مننگ ءُ۔ 341 زہمی ناجوڑ آتے آئسولیشن وارڈ آتیٹی تخنگانے، حکومت پہلی آن ہشت جماعت اسکان اسکول آتے عئید اسکان ملپننگ و 9 آن 12 اسکان تعلیمی ادارہ غاتے اینو دوشنبے آن سخت کورونا ایس او پی تا ر داٹ ملنگ نا فیصلہ کرینے۔ بنجائی وزیر تعلیم شفقت محمود نا کماشی ٹی بین الصوبائی وزیر تعلیم آتا ہلہلہ ئی دیوان مس، ہراٹی غٹ وزیر تعلیم آک ویڈیو لنک نا کمک اٹ بشخ ہلکر۔ دیوان اٹی تعلیمی ادارہ غاتیٹی کلاس آتا بحالی آ ہیت وگپ کننگا۔ دیوان اٹی غٹ صوبائی وزیر تعلیمک بورڈ کلاس آتے بنا کننگ نا سلاہ تسر۔ ولے این سی او سی نا کمامدار آتا پاننگ ئس کہ کیس آک ودنگ اٹی ءُ، داسکان تعلیمی ادارہ غاک ملنگپس تو جوان ءِ۔ دیوان اٹی فیصلہ کننگا کہ مچ آ ملک اٹی پہلی آن ہشت اسکان اسکول آتے عئید اسکان ملنگپک۔ وخت اس کہ 9 آن 12 اسکان نا تعلیمی ادارہغاک سخت کورونا ایس او پی تا رد اٹ ملنگ نا فیصلہ کننگا۔