روس، یوکرین جنگ اٹی ترندی،ماسکو آ سد آ ڈرون تا جلہو، کیف آ روسی میزائل جلہو آتیٹی 3 بندغ زوال

ماسکو، کیف، روس و یوکرین نا نیام اٹی جھیڑہ اٹی اسہ وار ولدا ترندی بس۔ روسی کمامدار آتا رِد اٹ ماسکو نا کنڈ آ بروک آ 600 آن زیات ڈرون آتے ایئر ڈیفنس بھس کرینے، وخت اس کہ یوکرین نا جتا جتا شار تیا روسی میزائل جلہو آتیٹی کم آن کم 3 بندغ زوال و 20 آن زیات ٹھپی مسر۔ ماسکو نا میئر سرگئی سوبیانین نا رِد اٹ دارالحکومت ءِ مچ آ نن بھلو کچ اسے ٹی ڈرون جلہو آتا مون تروئی تما۔ اونا رِد اٹ کساس 200 ڈرون ماسکو نا علاقہ ٹی خلنگار۔ ماسکو نا علاقائی گورنر آندرے وروبیوف جلہو آتے پوسکن آ وخت انا کل آن بھلا ڈرون جلہو آتیان اسٹ پارے۔ او پارے کہ علاقہ ٹی 6 بندغ ٹھپی مسر وخت اس کہ پوڈولسک اٹی اسہ ڈرون اسے نا ڈوک لگنگ آن کو لیڈینو انڈسٹریل پارک اٹی جوڑ وائلڈ بیریز نا گودام اٹی خاخر لگا‘ رپورٹ نا رِد اٹ یوکرین تدوک آ منہ ہفتہ غان وائلڈ بیریز تون گنڈوک کساس 20 گودام و ماڑی تے شست کرینے۔ یوکرین نا موقف ءِ کہ روسی فوج آتا کنڈ آن یوکرینی شار و بنداوی پنجر آ جلہو آتا ورندی ٹی روسی جنگی زرگزران تون گنڈوک ہدف آتے شست کننگ انگ ءِ‘ ایلو کنڈ آ روسی میزائل جلہو آتیٹی یوکرین نا زاپوریژیا علاقہ ٹی 2 بندغ زوال مسر وخت اس کہ صدر ولودیمیر زیلنسکی نا ہندی شار کریوی ریہ اٹی اسہ بندغ اس زوال مس۔ کمامدار آتا رِد اٹ کیف، بروواری، کریوی ریہ، اوڈیسا و دنیپروپیٹروفسک اٹی مروک جلہو آتا سوب آن 20 آن زیات بندغ ٹھپی مسر۔ کیف اٹی ننکان2 بجہ غا فضائی جلہو نا الرٹ جاری کننگا، ہرانا دمدستی پد کیہی دھماکہ غاتا توار بس‘ میئر وٹالی کلٹسکو پارے کہ کیف بیلسٹک میزائل جلہو آتا مون اٹی ءِ و شاری تے باہوٹ ہند آتے ٹی رہینگ نا پارت کرے۔ روسی جلہو آتا سوب آن دارالحکومت نا اوبولونسکی و ہولوسیوسکی ضلع غاتیٹی خاخر لگا‘ نیامی پولتاوا نا علاقہ ٹی کریمنچک شار ءِ ہم شست کننگا۔