دا وار بلوچستان اٹ مست آن 605 درسد زیات پِر کرینے

اسلام آباد: بنجائی وزیر چاگڑدی بدلی سینیٹر شیری رحمان پارینے کہ اینخو بلوچستان اٹی مست آن 605 درسد و سندھ اٹی 525 درسد زیات پِر کرینے، گلیشیئر تا دیر مننگ نا سوب آن نوکاپ نا خطرہ ودانے، پاکستان موسمیاتی بدلی نا اثرآتیٹی صف اول اٹی ءِ۔ داخیال آتا درشانی ءِ بنجائی وزیر چارشنبے نادے آ بزنس سمٹ 2022 اٹی تران کرسا کرے۔ بنجائی وزیر پارے کہ گلوبل وارمنگ اسہ راستکی اسے ہراڑان نمن مننگ مفک، پاکستان نا شمار چاگڑدی بدلی آن زہمی مروک آ ملک آتیٹی مریک، چاگڑدی کچٹی و موسمیاتی بدلی ترندی اٹ پیش بننگ ءِ، چاگڑدی بدلی آن ننا ملک آ بھلو اثراس تمنگ ءِ۔ شیری رحمان پارے کہ ننے بھلا درجہ حرارت و پِر مون تروک ءِ، اینخو بلوچستان اٹی 605 درسد و سندھ اٹی 525 درسد زیات پِر کرینے۔ پاکستان نا گلیشیئر دیر مننگ ءِ۔ شیری رحمان پارے کہ ننے موسمیاتی بدلی نا شدت و اثرآتا بارواٹ مخلوق ءِ معلومدار کننگ نا گرج ءِ، شون ہلوک ملک آک کاربن گیس آتا خارج کننگ اٹ کمتی کن جہانی فورم تیا کروک آ قول تیا عمل کیر، چاگڑدی بدلی نا رفتار ءِ ہرسا ننے تینا غٹ اولیت آتے 2050 آن 2030 اسکان گدریفنگ نا گرج ءِ۔ شیری رحمان پارے کہ اینخو زیات تر دیکی ملک آتے ودوک آ درجہ حرارت و دیر انا کمتی مون تروک ئس، چاگڑدی بدلی ننا 9.1 درسد جی ڈی پی آ اثرانداز مریک۔ اوپارے کہ نواب شاہ، جیکب آباد و تربت پدریسہ مسہ سال آن دنیا نا باسن آ شار رہینگانو، داجاگہ غاتا درجہ حرارت 50 ڈگری آن زیات ریکارڈ کننگا ہرا رہینگ نا قابل افس۔ بنجائی وزیر پارے کہ چاگڑدی بدلی ننکن بھلو وجودی تنکی اسے، پاکستان تینا چکار ءِ کاربن نا خارج کننگ اٹ تخفیف آ کرینے، ننن چاگڑدی بدلی نا بابت تینا اولیت آتے بدل کرینن۔ اوپارے کہ صنعتی کمپنی تے چاگڑد دوست ہدف آتا جوڑ کننگ نا گرج ءِ۔