قومی ٹیم انگلینڈ نا برخلاف داسہ ہم ٹیسٹ سیریز ءِ کٹنگ کیک‘انضمام الحق

لاہور (مانیٹرنگ ڈیسک) قومی کرکٹ ٹیم نا مسکوہی کیپٹن انضمام الحق پارینے کہ پاکستان نا ٹیم انگلینڈ آن جوان ءِ او قومی ٹیم داس ہم ہر مسٹ انگا میچ آتا سیریز ءِ کٹنگ کیک۔ تینا یوٹیوب چینل آ ویڈیو کلہو اٹ او پارینے کہ کنے لگک کہ پاکستان ٹیم انگلینڈ آن جوان ءِ او ننے اولیکو ٹیسٹ ءِ کٹوئی ئس، کنے داسہ ہم پام ارے کہ پاکستان ولدا ہم سیریز ءِ کٹنگ کیک، ہراتم نی اسہ سخت ءُ مرحلہ سے آن گدرینگ انگ اُس تو ٹیم نا باڈی لینگوئج ءِ بدل کروئی تمپ۔ مسکوہی چیف سلیکٹر پارینے کہ اولیکو ٹیسٹ اٹ مسٹمیکو دے آ ارٹمیکو ڈائی نا بیٹنگ آن پد پاکستان نا گوازی گرک پریشر نا گواچی خننگار۔ دا وڑ نا بے سہبی آن پد ٹیم مینجمنٹ نا کڑد اہمیت تخک انتئے کہ گوازی گر تا حوصلہ گچین مریک۔ اوفتے حکمت عملی نا بارواٹ ہیت کننگ نا گرج ءِ۔ انضمام الحق انگلینڈ نا برخلاف اولیکو ٹیسٹ اٹ اظہر نا کیپٹنی آ تنقید کرے و پارے کہ پاکستان نا ٹیم 277  نا سکور نا رکھ ءِ کننگ اٹ کیہی ٹریک آتے مس کرے۔ اولیکو ٹیسٹ میچ اٹ کٹنگ نا کریڈٹ بٹلر و ووکس اکن کاہک۔ ہڑتوم آک سٹروک گوازی کریر و اوفتے تینا دفاعی کرکٹ ءِ گوازی کتوس۔ او پارینے کہ پاکستان میچ اٹ سخت مقابلہ کرے کنے پام ئس کہ انگلینڈ ءِ 200 نا اسکور آ آؤٹ مروئی تمک۔ کیپٹنی پین جوان مننگ کریکہ ہراتم بٹلر و ووکس بیٹنگ کریرہ، شارٹ بال آتے آزمائفنگک کل چارہ کہ دا ہڑتوم آ گوازی گرک شارٹ بال گوازی کننگ کپسہ، کنے پاکستان نا باولنگ اٹ ہچ ءُ ویریشن اس نظر بتو۔