پاکستان سلامتی کونسل نا قرار داد 1540 آ پورو عمل کننگ اٹی ءِ، ترجمان دفتر خارجہ

اکستان جہانی امن، علاقائی سوگوی و جہان گرنچی زمواری تتون تعلقدار تینا موقف نا دوارگی ءِ کرسا پارینے کہ ملک سلامتی کونسل نا قرار داد 1540 آ پورو عملدرآمد کننگ اٹی ءِ، وخت اس کہ کشمیر ویل، دہشت گردی، ڈیہہ اٹی امن نا پک کننگ و سفارتی کوشست آتا بابت پاکستان نا موقف آخبتی و پیدوار ءِ۔ نیامی دے ٹِک اٹی امن کن سفارت کاری اسٹ انگا کسر ءِ، و اسلام آباد مفاہمتی یادداشت ڈیہہ اٹی امن نا بنداو ءِ۔ دفترِ خارجہ نا ترجمان طاہر حسین اندرابی ہفتہ وار بریفنگ نا وخت آ پارے کہ پاکستان و پرتگال نا نیام اٹی اسلام آباد اٹی تین پہ تینی سیاسی سلابت نا ریسہ اس مس، ہراٹی تین پہ تینی کمک تون اوار چندی باندات آتیا گپ و تران کننگا۔ ترجمان پارے کہ پاکستان اقوامِ متحدہ نا سلامتی کونسل نا قرار داد 1540 آ عملدرآمد نا بابت تینا رپورٹ ءِ جمع کرفینے۔ او پارے کہ دا قرار داد بھلو کچ اسے آ بھسکاری کروک آ سلہہ، ہرافتیٹی ایٹمی، کیمیائی و حیاتیاتی سلہہ اوار ءُ، نا تالان مننگ ءِ توننگ نا بابت ءِ۔ ترجمان پارے کہ پاکستان تدوک آ 22 سال آن تینا جہانی زمواری تے پورو کننگ اٹی ءِ و کم و وَد ہر مسہ سال آن پد بھلو کچ اسے آ بھسکاری کروک آ سلہہ غاتا بابت رپورٹ پیش کیک۔ ترجمان دفترِ خارجہ حریت سرکڑدہ غاتا برخلاف بھارتی ادارہ غاتا کنڈ آن دائر کروک آ پوسکن آ چارج شیٹ ءِ مسترد کرسا پارے کہ دا کارروائی سیاسی بنداو اس تخک و مذمت کڑزک۔ او پارے کہ بھارت نا گام گیج آتا مسخت کشمیری الس ءِ اوفتا بنداوی حقِ خودارادیت آن محروم کننگ ءِ۔ اونا رِد اٹ بھارتی ادارہ غاک کانود نا رد اٹ کارروائی تے سیاسی مسخت کن کاریم اٹ اتنگ اٹی ءُ و دہ دہائی متکن آ مقدمہ غاتے دوارہ زندہ کننگ ہندا پالیسی نا بشخ اسے۔ ترجمان پارے کہ مقبوضہ جموں و کشمیر نا جہان گرنچی وڑ اٹ منوک آ حیثیت ءِ دن انگا گام گیج آتیان بدل کننگ مفک۔ او پہلگام واقعہ تون پاکستان ءِ گنڈنگ نا کوشست آتے بے کاٹم گوندسا پارے کہ بھارت اینو اسکان تینا دوبہ غاتا مخ تفی ٹی ہچ ءُ پک ءُ شاہدی اس پیش کننگ کتنے۔