ایران نا تکنیکی و زرگزرانی کمک، امریکہ نا روسی بینک آ رکھ انا پڑو

واشنگٹن، امریکہ ایران ءِ تکنیکی و زرگزرانی کمک تروک آتا برخلاف کارروائی نا پڑو کرینے۔ امریکی وزیرِ خزانہ سکاٹ بیسنٹ پارے کہ ایرانی رجیم نا کمکار آتیا کارروائیک برجا سلرہ، امریکہ آپریشن اکنامک آؤٹ کاسٹ نا رِد اٹ روسی وی ٹی بی بینک آ رکھ خلکنے۔ اسکاٹ بیسنٹ پارے کہ روسی بینک ایران ءِ زرگزرانی رکھ آتیان بچفنگ و مالی کمک کرینے، تہران ءِ مالی کمک تروک آتے شست کننگک۔ امریکی وزیرِ خزانہ پارے کہ واشنگٹن انتظامیہ ہمو کل بندغ، ادارہ غاتے شست و ژند کننگ ءِ برجا تخک ہرافک ایرانی رجیم ءِ مادی، تکنیکی یا مالی کمک فراوان کننگ اٹی ءُ۔ اسکاٹ بیسنٹ مستی پارے کہ امریکی گام گیج نا مسخت تہران و ماسکو نا نیام اٹی مالیاتی نیٹ ورک ءِ پرغنگ ئس، ایران آن جہانی رکھ آتیا ترندی اٹ عملدرآمد کرفوئی ءِ۔