وزیر اعلیٰ بلوچستان نا کرونا نا بابت گام گیج آتے پین گچین کننگ نا پارت

کوئٹہ (خ ن ) وزیراعلیٰ بلوچستان جام کمال خان کررونا وائرس تون مون تننگ کن برجا انگا گام گیج آتے پین جوان کننگ، کرنٹائن کروک آ زاہر تا ٹیسٹ انا عمل اٹ ودکی و زاہر تے تروک آ آسراتی تے پین جوان کننگ نا پارت کرینے وخت اس کہ او کوئٹہ نا ہسپتال و ایلو بلڈنگ آتے آئسولیشن بنجاہ جوڑ کننگ و پرائیویٹ ہسپتال آتیان کمک ہلنگ نا ہم پارت کرینے۔ وزیراعلیٰ کرونا وائرس نا توننگ نا بابت اڈ ہلوک دیوان نا کماشی ءِ کننگ اٹی ئس۔ ہراٹی صوبائی وزیر تیان میر ضیاءلانگو، زمرک خان اچکزئی، میر ظہور بلیدی، ایڈیشنل چیف سیکرٹری داخلہ حافظ عبدالباسط، سیکریٹری جانجوڑی، ڈی جی پی ڈی ایم اے، کمشنر و ڈپٹی کمشنر کوئٹہ ہم بشخ ہلکر۔ وزیراعلیٰ تفتان آن کوئٹہ اسکان جتا جتا جاگہ غاتیا چیک پوائنٹ جوڑ کرسا اوڑے المی آ آسراتی تا تننگ، سیم تےان غیرکانودی آ ہننگ بننگ ءِ سختی اٹ توننگ و اوفتے ٹی اختہ انگا کارندہ غاتا برخلاف سخت کارروائی کننگ نا پارت کرینے۔ وزیراعلیٰ تفتان وکوئٹہ نا کرنٹائن اٹ تعینات افسرک و کارندہ غاتا رکھوک ایس او پی جاری کننگ نا ہم پارت کرینے وخت اس کہ او تفتان ٹا ¶ن، تفتان آن کوئٹہ روٹ و کوئٹہ نا کرنٹائن اٹ امن و ایمنی نا حالیت آتے جوان کننگ کن خاص ءُ رکھوک گام گیج کننگ نا ہم پارت کرینے۔ سیکرٹری جانجوڑی، ڈی جی پی ڈی ایم اے و کمشنر کوئٹہ نا کنڈآن دیوان ءِ کرونا وائرس نا بابت و حکومتی گام گیج آتا بابت اٹ بریفنگ تسنے، دیوان آن تران کرسا وزیراعلیٰ پارینے کہ کرونا وائرس صوبہ نا اسہ حلقہ یا علاقہ سے نا اف وخت اس کہ مچ آ صوبہ نا ویل ءِ۔ ہراڑتون جوان وڑ اٹ مون تننگ حکومت نا ذمواری ءِ۔ صوبائی وزیرک ہم اُلس تون حال احوال کرسا اوفتے رکھوک آ گام گیج آتا بابت معلومدار کیر۔ دا اسہ سخت ءُ وخت اسے ہراڑان پیش تمننگ کن حکومت و کمیونٹی ءِ جوان کڑد ادا کروئی ءِ، وزیراعلیٰ پارینے کہ مالو نا غلط انگا پالیسیک و بدانتظامی آن محکمہ جانجوڑی ءِ بھس کننگا ہرانا جوانی کن انقلابی وڑ اٹ بدلی نا گرج ءِ۔