وزیر داخلہ میر ضیاءلانگو نا ایران آن غیر کانودی وڑ اٹ بننگ آتیا گڑتی

کوئٹہ (خ ن) صوبائی وزیر داخلہ میر ضیاءاللہ لانگو ایران نا سیم آن غیر کانودی وڑ اٹ پترینگ نا کسر تا کمک اٹ مخلوق نا بننگ آ گڑتی نا درشانی کرسا تعلقدار کمامدار آتیان رپورٹ بٹنگانے۔ یات سلے کہ مچ آ ملک اٹ کرونا وائرس الرٹ نا رد اٹ غیر کانودی وڑ اٹ سیم آن جپنگ نا موکل اف۔ صوبائی وزیر داخلہ دا بابت پارے کہ دا وڑ انا واقعہ غاتا مننگ گڑتی و فریشانی نا سوب ئِ۔ کروناوائرس آن بچنگ کن ننے غٹ ئِ اخس کہ مننگ کرے رکھی وڑو ڈَول دوئی کروئی تمک۔ دا حالیت آتے رد اٹ ایران اٹی کرونا وائرس نا سوب آن مروک زوال آتیان پد بلوچستان نا ایران تون گنڈوک سیمی علاقہ غاتیٹی ایمرجنسی نافذ ئِ، ولے داسہ اوغانستان اٹی وائرس نا کیس آک رپورٹ مننگ ئُ، تو گڑا بلوچستان نا اوغانستان تون گنڈوک ضلع غاتیٹی ہم ایمرجنسی نافذ کننگانے، ولے کرونا وائرس نا بابت صوبائی حکومت نا تعلقدار ادارہ غاک سنبرینگوک سلوک ئُ۔ گڑا دا بابت غٹ تعلقدار فورس آتے سختی اٹ پارت کننگانے کہ او دا وڑ انا غیر کانودی کارروائی تا زموار آتا برخلاف دمدستی کاروائی کیر۔