ریڈ کارڈ انتئے کریس؟ فٹبالر ریفری ءِ لغت مُچ کرے‘ ریفری ہسپتال اٹ داخل

ماسکو (مانیٹرنگ ڈیسک) روسی دارالحکومت اٹ مروک آ فٹ بال میچ اٹی ریڈ کارڈ نشان تروک آ فٹ بالر ریفری ءِ لغت مُچ کرے۔ گوازی گر روس نا قومی فٹ بال ٹیم نا مسکوہی کیپٹن شیروکوف ئس۔ ریفری کیہی گھنٹہ ہسپتال اٹ داخل مس۔ دا میچ اسہ دوستانہ فٹ بال میچ اس ئس ہرا ماسکو ٹی ہندا ہفتہ تی گوازی کننگاکہ۔ گوازی ٹی اسہ ہندن ءُُ لمحہ اس بس کہ ریفری اسہ مڈفیلڈ گوازی گر ءِ خراب ءُُ فاؤل اس کننگ آ ریڈ کارڈ نشان ترسا گراؤنڈ آن پیش تمنگ نا پارے۔ دا گوازی گر رومان شیروکوف ئس، ہرا مالو روس نا قومی فٹ بال ٹیم نا کیپتن ہم مسنے۔ ریڈ کارڈ ملنگ آ او وخت آ 39 سال نا شیروکوف ہموخس مشتعل مس کہ او ہر وڑ نا قواعد و ضوابط ءِ اسہ کنڈ کرسا اولیکو ریفری نا با اٹ اسہ تیز ءُُ فینٹ اس خلک۔ ولدا ہراتم دکہ تس تے ریفری ڈغار آ تما و اونا کاٹم اس لغت اس ہم خلک۔ دا کل اسہ میچ اٹی مسر، وخت اس کہ اونا ویڈیو ہم جوڑ مسوسُس۔ دا واقعہ غان پد ریفری نِکیتا دانخنکوف تینا اسہ ویڈیو کلہو اسے ٹی پارے کہ دا جسمانی جلہو آن پد او کیہی گھنٹہ اسکان ہسپتال اٹ دارو درمان مس۔ دا ویڈیو ٹی ہندن خننگ کینہ کہ ہراوڑ اونا مون پریسنے او اسہ خن اس تے خرن ہم مسنے۔ دافٹ باؤلر پد آن انسٹاگرام آ تینا اسہ بیان اس ہم جاری کرے، ہراٹی او منا کہ میچ اٹ اسہ خراب ءُُ حالیت اسے ٹی بس او ریفری نِکیتا دانخنکوف تون اُست خواہی و معافی خواوہ۔ روس نا سرکاری میڈیا نا رداٹ دا واقعہ نا ریفری نا خاہوت اسہ جسمانی جلہو اسے وڑ اٹ ماسکو پولیس تون غاو ہم کرینے و پولیس ہم دا واقعہ نا جاچ ءِ ہلنگ اٹی ءِ۔ میڈیا رپورٹ آتیٹی دا بابت اٹ روسی فٹ بال فیڈریشن نا ہچ ءُُ ردعمل اس مون آ بتو۔