گچین کاری تا بابت سنجیدہ ہیت وگپ کن تیار ان‘ پی ٹی آئی

اسلام آباد : پاکستان تحریک انصاف پارینے کہ گچین کاری تا بابت سنجیدہ و بھرم تروک ہیت وگپ کننگ کن تیار ان‘ اومیت کینہ کہ کل ریاستی ادارہ غاک آئین آ عملدرآمد کن تینا کڑدار ءِ سر ایترہ‘ الیکشن کمیشن ءِ پانہ کہ نگران حکومت کن سپریم کورٹ آن توسیع ہلے یا پنجاب اٹ پوسکن ءُ وزیراعلیٰ وکابینہ جوڑ کننگے‘ تینا بیان اٹ پی ٹی آئی نا راہشون اسد عمر پارے کہ تنکی نا ایسر گچین کاریک ءُ‘ اوفتتون پین سلاہ اس ارے تو پار‘ او پارے کہ نن گچین کاری تیکن سنجیدہ و بھرم تروک ہیت کننگ کن تیار ان‘ ایلو کنڈآ فواد چوہدری پارینے کہ عدلیہ و اسٹیبلشمنٹ ءِ بشخ وبانٹ کننگ نا ہیت آک بایدے مفس۔ الیکشن کمیشن ءِ پانہ کہ نگران حکومت کن سپریم کورٹ آن توسیع ہلے یا گڑا پنجاب اٹ پوسکن ءُ وزیراعلیٰ و کابینہ جوڑ کننگے‘ فواد چوہدری پارے کہ ریفرنس ءِ ڈرافنٹ کننگ اٹی ان ہرادے الیکشن کمیشن آ راہی کینہ۔

(آن لائن)