بلوچستان اٹی گڈیکو دہشت گرد نا ساڑی مننگ اسکان جنگ برجا سلک،وزیر اعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان اٹی گڈیکو دہشت گرد نا ساڑی مننگ اسکان جنگ برجا سلک، دہشت گردی نا برخلاف سویلین و عسکری سرکڑدہ غاک پورو وڑ اٹ امنا و یکسو ءُ، دا باندات آ ہچ ءُ بے باوری اس اف۔ دا خیال تا درشانی ءِ او تدوک آ دے وزیراعلیٰ سیکرٹریٹ اٹی قومی میڈیا نا اینکر، سینئر صحافی و ایلو نمائندہ غاتتون ویڈیو لنک آ و تران کرسا کرے۔ دا وخت آ صوبہ نا جم حالیت، شونداری عمل، معدنیات و کان کنی، امن و ایمنی، سیاسی باندات و حکومتی گام گیج آتتون تعلقدار چندی باندات آتیا خوڑتی اٹ گپ وتران کننگا۔ داڑان مست وزیراعلیٰ سیکرٹریٹ اٹی صوبہ نا راجی و زرگزرانی بشخ، معدنیات و کان کنی و امن و ایمنی تون تعلقدار اہم بریفنگ آک ہم اڈ ہلکر، ہرافتیٹی صوبائی حکومت نا سُج پام، برجا ڈٹ و الس ءِ رسینگوک آسراتی تا جاچ ءِ ہلنگا۔ وزارت ڈٹ بندی و شونداری نا بریفنگ اٹی صوبائی حکومت نا راجی و زرگزرانی بشخ آتتون گنڈوک سُج پام، گورننس، سروس ڈیلیوری، شونداری فنڈ آتا جوان کاریم اٹ اتنگ و شونداری ڈٹ آتا فائدہ غاتے الس اسکان سر کننگ نا گام گیج آتیا ہیت کننگا۔ وزارت معدنیات و وسیلہ غاتا بریفنگ اٹی بلوچستان اٹی معدنیات و کان کنی نا بشخ نا واکداری، برجا ڈٹ و دا بشخ انا شونداری کن ہرفوک گام گیج آتیا سرجم تران کننگا۔ بریفنگ اٹی پاننگا کہ معدنی وسیلہ غاتے گچین وڑ اٹ کاریم اٹ اتسا صوبہ نا الس کن زرگزرانی و ایلو فائدہ غاتے پیدوار کننگ نا گام گیج برجا ءُ۔