ڈپٹی کمشنر قلات انجینئر عائشہ زہری نا ٹیچنگ ہسپتال قلاٹ نا اناگت دورہ، جتا جتا بشخ آتا جاچ و طبی آسراتی تا جم جاچ

قلاٹ، ڈپٹی کمشنر قلاٹ انجینئر عائشہ زہری ٹیچنگ ہسپتال قلاٹ نا اناگت دورہ ءِ کرے، ہراڑے او ہسپتال نا جتا جتا بشخ آتا دورہ ءِ کرسا ساڑی طبی آسراتی، سفا انگا چاگڑد و پیش بروک ویل آتا جم جاچ ءِ ہلک۔ قائمقام ایم ایس ڈاکٹر محمد یعقوب زہری و ڈاکٹر گنشام داس ڈپٹی کمشنر ءِ ہسپتال نا جتا جتا بشخ آتا دورہ ءِ کرفیر و اودے طبی آسراتی، انتظامی باندات و مون تروک ویل آتتون گنڈوک بریفنگ تسر۔ ڈپٹی کمشنر ہسپتال اٹی ڈاکٹر و ایلو طبی و غیر طبی کاریمی تا حاضری تے چیک کرے۔ او ایمرجنسی، او پی ڈی، آپریشن تھیٹر، آئی ٹی سیکشن و ایلو بشخ آتا جم دورہ ءِ کرے، وخت اس کہ ناجوڑ آتے تننگوک طبی آسراتی، دارو تا فراوانی و سفا انگا چاگڑد نا بست و بند آتا ہم خوڑتی اٹ جاچ ءِ ہلک۔ دا وخت آ تران کرسا ڈپٹی کمشنر انجینئر عائشہ زہری پارے کہ جانجوڑ راج اسے نا ٹہیفنگ کن الس ءِ آب اٹو طبی آسراتی تا فراوانی المی ءِ۔