ارٹمیکو ٹیسٹ‘پِر نا سوب آن گوازی ءِ توننگا

ساؤتھ ہیمپٹن (مانیٹرنگ ڈیسک) پاکستان انگلینڈ نا برخلاف ارٹمیکو ٹیسٹ میچ اٹ شان مسعود نا وکٹ نا با تننگ آن پد گچین گوازی کرسا اسہ وکٹ اسے نا نسخان آ 62 رنز جوڑ کرینے۔ پاکستان ڈائی نا بنا ءِ کرے تو اولیکو میچ اٹ سنچری کروک آ شان مسعود پنی آ انگلش فاسٹ باؤلر جیمز اینڈرسن نا بال آ تینا وکٹ ءِ رکھوک کننگ کتو و ایل بی ڈبلیو مس۔ اوکان پد عابد علی تون کمک کننگ کن کیپٹن اظہر علی بس و ہڑتوم آ گوازی گرک گچین وڑ اٹ بیٹنگ کرسا بنائی نسخان نا پوروی نا کوشست ءِ کریر۔ دا وخت اٹ عابد علی ارا وار خوش قسمت ہم سلیس ہراتم بال اونا بیٹ اٹ لگسا سلپ اٹ سلوک آ فلیڈر نا دو تیان کیچ تما، ہڑتوم آ گوازی گرک گچین ءُ گوازی کریر، او ہراتم پر انا سوب آن چا انا وقفہ، وخت آن مست ہلنگا تو پاکستان اولیکو ڈائی ٹی اسہ وکٹ نا نسخان آ 62 رنز جوڑ کریسُس۔ عابد علی 33 و اظہر علی 20رنز جوڑ کریسر۔ انگلینڈ نا کنڈآن اسٹ انگا سرسہب آ باؤلر جیمز اینڈرسن ئس۔ داکان مست پاکستان انگلینڈ نا برخلاف ارٹمیکو ٹیسٹ میچ اٹ ٹاس ءِ کٹسا اولیکو بیٹنگ نا فیصلہ کرینے۔ اظہر علی پارینے کہ دا وکٹ آ مانچسٹر نا مقابلہ ٹی زیات خرسی ارے ولے وکٹ تہہ آن خشک ءِ او ننے اومیت ءِ کہ نن جوان اسکور کننگ اٹ سرسہب مرینہ۔ پاکستان میچ اکن ٹیم اٹ اسہ بدلی اس کرینے او شاداب خان نا جاگہ غا فواد عالم ءِ ٹیم نا بشخ اس جوڑ کرینے۔ اظہر علی پارینے کہ دا وکٹ آ اسہ اسپنر اس بھاز ءِ او نن تینا بیٹنگ ءِ سوگو کننگ خواہسنہ۔