بلوچستان اٹ ہر کہول آ پولیس آتا وردی بیننگ ءِ پک کننگ نا پارت

صوبائی وزیر داخلہ میر ضیاء اللہ لانگو نا کماشی ٹی تدوک آ دے صوبہ ٹی امن ایمنی نا ساڑی حالیت نا بابت بڑزکو کہولی دیوان اس اڈ ہلک، دیوان اٹی چیف سیکرٹری بلوچستان مطہر نیاز رانا اسلام آباد آن ویڈیو لنک نا کمک اٹ بشخ ہلک، دیوان اٹی صوبہ ٹی امن ایمنی نا جم حالیت نا سرجم جاچ ہلنگا، چیف سیکرٹری بلوچستان مطہر نیاز رانا، انسپکٹر جنرل پولیس محمد طاہر راے، ایڈیشنل چیف سیکرٹری داخلہ ارشد مجید، سیکرٹری پرائمری صحت عزیز جمالی و کمشنرکوئٹہ ڈویژن اسفندیار کاکڑ اس تیان بیدس ریجنل پولیس افسر آک، محکمہ داخلہ و پولیس نا ایلو بڑزکو کہولی کمامدار آک بشخ ہلکر۔ ایڈیشنل چیف سیکرٹری داخلہ نا کنڈ آن دیوان ءِ صوبہ ٹی امن ایمنی، پرائیویٹ سیکورٹی گارڈ آتا جم حساب و سیکرٹری پرائمری ہیلتھ عزیز جمالی نا کنڈ آن کورونا وائرس نا ساڑی و مچ آ صوبہ ٹی چیک پوسٹ آتا حالیت ءِ گچین کننگ کن گام گیج، و آخبت نا لائحہ عمل آ سرجم بریفنگ تننگا۔ وزیر داخلہ منہ دے ٹی صوبہ نا چندی ضلع غاتیٹی پرائیویٹ سکیورٹی گارڈ آتا پاش سلہہ ہرفنگ و مون آ شیشہ غاتا بابت گڑتی درشان کرسا تعلقدار کمامدار آتے دا وڑ انا واقعہ غاتا توننگ کن جامع حکمت عملی اس سجفنگ نا پارت کرے۔ وزیر داخلہ صوبہ ٹی امن ایمنی نا حالیت نا جاچ ءِ ہلنگ کن باقاعدہ دیوان اڈ تننگ نا فیصلہ کرسا پارت کرے کہ افسر آک تینا تعلقدار ریجن آتیٹی امن ایمنی نا حالیت و دا رد اٹ تینا جم کارکڑد نا بابت بروک آ دیوان تیٹی سرجم بریفنگ ایتر۔ وزیر داخلہ صوبہ ءِ غیر کانودی سلہہ و منشیات آن پورو پاک کننگ نا عزم کرسا پارے کہ کانود نافذ کروک آ ادارہ غاتے دا رد اٹ پبی و خننگوک گام گیج کروئی تمک، دیوان اٹی صوبہ ٹی پاش سلہہ ہرفنگ آ رکھ انا ہم اصولی فیصلہ کننگا، و دا بابت پک فیصلہ صوبائی کابینہ کیک۔ وزیر داخلہ پارے کہ صوبائی حکومت امن ایمنی نا حالیت ءِ گچین کننگ کن کانود نافذ کروک ادارہ غاتے پین سوگو کننگ کن کل وسیلہ فراوان کیک، ولے کانود نافذ کروک ادارہ غاتے دا بابت السی اومیت آتیا پورو بروئی تمک۔ او پارے کہ کانود نافذ کروک ادارہ غاک جوان کاریم کننگ اٹی ءُ، و داٹی پین گچینی اتنگ نا گرج ءِ۔ ننا فورس آک بے مٹ ءُ، ہرافتے نن گمری ءُ فورس اس جوڑ کینہ۔ وزیر داخلہ ہر کہول آ کانود نا پبی عملدرآمد ءِ پک کننگ نا گرج آ زور شاغسا تعلقدار کمامدار آتے پارت کرے کہ شرپسند آتے نظر آن چَپ کننگپ، گاڈی تیا مون انگا شیشہ خلوک آتا برخلاف پبی مہم چلیفنگے، پاش سلہہ ہرفنگ، بڑزائی سم کاری، منشیات ہلنگ و بہا کننگ، و ایلو راج دشمن سرجز آتا برخلاف پبی کاروائی کننگے۔ او پارت کرے کہ گچین مروک السی نمائندہ غاتتون ڈیوٹی کروک پولیس کارندہ غاتا سول پچ آتیا رکھ خلنگے، مچ آ صوبہ ٹی کل پولیس چیک پوسٹ آتا حالیت ءِ گچین کرسا اوڑے کیمرہ خلنگے۔ و تھانہ غاتا کہول آ الس تون پولیس نا رویہ ٹی گچینی اتنگے۔