صوبہ غاتا آئینی و مالیاتی واکداری تے کم کننگ نا کوشست کننگ انگ ءِ، آصف زرداری

اسلام آباد : مسکوہی صدر آصف علی زرداری پارینے کہ ملک انا یکئی ءِ دارّ و درّ کننگانے، وزیر اعظم عمران کان آمر پرویز مشرف نا رند ءِ دننگ اٹی ءِ، صوبہ غاتا آئینی و مالیاتی واکداری تے کم کننگ نا کوشست کننگ انگ ءِ، بروک آ وخت زیات خطرناک ءِ، قومی سیوت وخت انا گرج ءِ، دا ہیت آتا درشانی ءِ او پیپلز پارٹی پنجاب نا صدر قمر زمان کائرہ تون ٹیلفون آ ہیت و گپ نا وخت آ کرے۔ ہڑتوم آ راہشون تا نیام اٹ مچ آ ملک اٹ کورونا دین، سیاسی و پارٹی باندات آتیا ہیت و گپ کننگا۔ قمرزمان کائرہ پارے کہ آصف زرداری کورونا غا گڑتی و حکومتی فیصلہ غاتیا ہم گڑتی نا درشانی کرینے۔ مسکوہی صدر آصف علی زرداری ملک اٹ کورونا وائرس کےس آتا ودوک آ کچ و حکومتی فیصلہ غاتیا ترند مس۔ او پارے کہ بد بختی نا ہیت اسے کہ حکومت کورونا دین اتون جنگ تننگ نا جاگہ غا اپوزےشن تون دُو زنچک مننگ ءِ۔ حکومت ملک اٹ ساڑی غٹ امنائی تے بھس کرینے۔ حکمران آک ولدا صوبہ غاتیان آئینی و مالیاتی واکداری تے پدی ہلنگ خوارہ۔ کورونا وائرس نا بابت بروک آ وخت زیات خواری نا سوب ءِ۔ ننے قومی سیوت نا گرج ءِ۔ آصف زرداری نا پارینے کہ ہراتم 2008ءاٹی پیپلز پارٹی ءِ اقتدار ملا تو ملک دہشت گردی و نفاق نا گواچی ئس۔ نن قومی سیوتی سلاہ اٹ سوات آپریشن کرے و امن ایس۔ ملک اٹی خولم نا کاختی ئس، نت انا زی آ جھیڑہ غاک مسرہ، نن ملک ءِ کن خور اٹ سیرگنج کرین۔ بد بختی نا ہیت اسے کہ حکمران آن مشرف نا رند ءِ دننگ اٹی ءُ۔ اسہ وار ولدا ملک ءِ مشرف دور انا کنڈ آ دننگ انگ ءِ۔ بلوچستان ناراض ئس، آغاز حقوق بلوچستان پیکیج ترسا اودے خڑک کرینے۔ مشرف آمریت نا سوب آن بنجا ءِ فریشانی و گڑتیک مون تروک ئسرہ۔ نن صوبہ غاتے آئینی و مالیاتی واکداری ترسا بنجا ءِ سوگو کرین۔ آصف زرداری پارے کہ حکمران آک اسہ وار ولدا صوہب غاتا آئینی و مالیاتی واکداری تے کم کننگ خوارہ۔ حکمران آک ملک اٹ ساڑی سیوت ءِ بھس کرینو۔
( آن لائن )