بندی تیکن ماسک‘ رکھی کٹ و رکھی گام گیج آک المی ءُ‘ انجینئر جمیل کرد

کوئٹہ (آن لائن) الخدمت فاﺅنڈیشن بلوچستان نا صدر انجینئر جمیل احمدکرد‘ جنرل سیکرٹری اعجازمحبوب اسک پارینو کہ جیل انابندیک ہم ننا راج انا بشخ و اوفتا ہم حق ارے‘ بندی تیکن ماسک‘ رکھی کٹ و رکھی گام گیج آک المی ءُ۔ الخدمت فاﺅنڈیشن راج انا ہر تپّہ اسکان سر مرسا اوفتا کمک ءِ کننگ اٹی ءِ۔ساڑی فریشان کروک حالیت آتے ٹی پولیس، سیکورٹی فورس، ڈاکٹر و صحافی تتون اوار عالم دین‘ فلاحی تنظیم آتا رضاکار آتا رکھ‘ غریب آتا کمک و الس ءِ آگاہی فراوان کننگ ننا اولیت آتے ٹی اوار ءِ۔ دا خیال آتا درشانی ءِ او کوئٹہ جیل اٹ سپرنٹنڈنٹ جیل ڈاکٹرسلیم رضا تون اوڑدہی نا وخت آ ہیت وگپ کرسا کریر‘ داوخت آ الخدمت فاﺅنڈیشن ناکنڈآن رکھی کٹ، ماسک، دستانہ‘ سینیٹائزر جیل سپرنٹنڈنٹ ءِ تننگا۔ جیل سپرنٹنڈنٹ الخدمت فاﺅنڈیشن نا خذمت آتاستاءِ کرے۔