دنیا نا 8 انٹیلی جنس چیف پاکستان اٹی ءُ، بھارت آ ڈغار کٹانے، شیخ رشید احمد

کراچی(آن لائن) بنجائی وزیر داخلہ شیخ رشید احمد پارینے کہ دنیا نا 8 انٹیلی جنس چیف پاکستان اٹی ءُ، ہرانا سوب آن بھارت آ ڈغار کٹانے، اوغانستان نا اکاؤنٹ آتے منجمد کننگ عقلندہ ئی اس اف، دنیا غان خواست کینہ کہ اوغانستان نا اکاؤنٹ آتے بحال کننگے، پاکستان اوغان سیم آ باڑ خلکن کہ دہشت گردی مف، مچ آ پاکستان اٹی اسہ جاگہ اس ہم اوغان مہاجر کیمپ اف، ہرافک ڈکوئی بسر اوفتے ہمو کسر اٹ پدی راہی کننگا، پاکستان اٹی فرقہ وارانہ چاگڑد اس جوڑ کننگ انگ ءِ، ہراٹی پیشن نا دُو اوار ءِ۔ الیکڑونک مشین تا بابت الیکشن کمیشن نا گڑتی تے اینک کننگک۔ اپوزیشن والاک الیکشن مہم آٹو، ننا برخلاف افس۔ یک شنبے نا دے کراچی ٹی پریس کانفرنس نا وخت آ شیخ رشید پارے کہ اوغانستان اٹی پاکستان نا است خواہی بیرہ امن و سوگوی کن ءِ۔ پاکستان دنیا تون امن ایمنی نا ہیت کیک، نن امن کن طالبان تے امریکہ تون تولفین، پاکستان ہشت دہ ہزار بندغ ءِ اوغانستان آن کشسا ایلو ملک آتیا سر کرے، مچ آ دنیا نا 8 انٹیلی جنس چیف پاکستان آ بسر، ہرانا سوب آن بھارت آ ڈغار کٹانے، بھاتی میڈیا دروغ تڑنگ اٹی ءِ، و چرکاو اٹ پاکستان آ رکھ انا ہیت کننگ ءِ۔ مودی پنج شیر نا سٹی آ کِسہ غاتے چلیفنگ اٹی ءِ۔ بنجائی وزیر داخلہ شیخ رشید پارے کہ وزیر اعظم عمران خان فیصلہ کیک کہ اوغانستان اٹی طالبان تا حکومت ءِ امنا کروئی ءِ یا آخا۔ شیخ رشید پارے کہ پاکستان نا ادارہ غاک عظیم ءُ، او پاکستان کن زندہ ءُ، و پاکستان کن کہیرہ۔ دا پاننگ کہ نن اوغان حکومت ءِ امنا کرینن یا آخا، دانا فیصلہ ءِ عمران خان کیک۔ ادارہ غاک خوارہ کہ دا ڈیہہ اٹی امن مرے، عمران خان نا حکومت ڈیہہ اٹی امن کن کل اتون حالی حوالی ارے۔ ای 17 تاریخ آ چین و روس انا صدر تتون اوڑدہی کیوہ، وخت اس کہ اومیت ارے کہ ایران نا صدر ہم اوڑدہی کیک۔ او پارے کہ پاکستان نیام تمپک، و دا ہم کہ کس ءِ نیام تمنگ کن الیپک ہم۔ وخت اس کہ پاک فوج ہر وڑ انا حالیت آتتون مون تننگ کن سنبرینگوک ءِ۔ مسکوہی اوغان حکومت نا بابت اسہ سوج اسے نا ورندی ٹی شیخ رشید پارے کہ عمران خان اشرف غنی ءِ ازبکستان اٹی پہہ کرے ولے او پاکستان آن 10 ہزار مجاہد اوغانستان اٹ پترینگ انگ نا دوبہ خلک، ولے داسہ کل ءِ سما تما کہ ننا اوغانستان تون ہچ ءُ کاریم اس اف، و پاکستان، اوغانستان نا ویل آتے اوفتیا اِلانے۔ او پارے کہ دنیا خواہک کہ اوغانستان 8 دے ٹی آب اٹو علاقہ اس جوڑ مرے، ولے داٹی وخت لگک، و دا یات تخنگے کہ اوغانستان نا کھاتہ غاتے منجمد کننگ عقلندہ ئی اس اف، داڑان بھلو تنکی اس ودی مننگ کیک۔ بنجائی وزیر داخلہ نا پاننگ ئس کہ نن دنیا غان خواست کینہ کہ اوغانستان نا کھاتہ غاتے بحال کننگے، کہ اوغانستان اٹی تنکی ودی مف۔ اسہ سوج اسے نا ورندی ٹی او پارے ای مہالو پارینٹ کہ پاکستان اٹی ساڑی 40 لکھ اوغان مہاجر نا بابت حکومت بایدے سجفے، ولے اوکان ہم مست اوغانستان اٹی طالبان تا حکومت ءِ سوگو کننگ نا گرج ءِ۔