پاکستان نا فتحِ مبین نا کنڈ آ سفر ءِ دنیا نا ہچ ءُ واکدار اس توننگ کپک،میر سرفراز بگٹی

کوئٹہ، وزیراعلیٰ بلوچستان میر سرفراز احمد بگٹی بروک آ سال مئی ٹی کوئٹہ ٹی “بنیان المرصوص” نا سرحال آ جہانی کہول انا خطاطی نمائش نا اڈ تننگ نا پڑو ءِ کرسا پارینے کہ نمائش اٹی اسلامی دنیا، ترکی و ایلو ملک آتا پنی آ خطاط و ازمکار آک بشخ ہلیرہ، وخت اس کہ حکومت بلوچستان دا جہانی ایونٹ ءِ اسپانسر کیک۔ دا خیال آتا درشانی ءِ او سے شنبے نا دے رسولِ رحمت ﷺ خطاطی نمائش نا بنا نا وخت آ تران کرسا کرے۔ وزیراعلیٰ پارے کہ 14 اگست و اگست نا تُو اٹی دا وڑ انا دود انا اڈ تننگ تینٹ اٹ مچ آ پاکستان کن اسہ کلہو اسے کہ بلوچستان اٹی جہانی آب انا دا وڑ انا پروگرام اڈ تننگ نا لائخی و عزم ساڑی ءِ‘ او پارے کہ او خطاط واصل شاہد آن بروک آ سال مئی ٹی جہانی کہول انا خطاطی نا اسہ بھلو نمائش اس اڈ تننگ نا خواست کرینے ہرا نا کنڈآن حکومت بلوچستان کمک کیک و سرینا ہوٹل ءِ مہمانداری کن پندار کننگک انتئے کہ دا رد اٹ اولیکو گام سرینا ہرفینے۔میر سرفراز بگٹی پارے کہ جہانی خطاطی نمائش اٹی اسلامی دنیا، ترکی و ایلو ملک آتا پنی آ ازمکار آتے سلہ خلنگک مرو تانکہ کوئٹہ غان مچ آ دنیا ءِ دا کلہو تننگ مرے کہ کوئٹہ نا الس فنونِ لطیفہ تون مہر کروک و امن پسند ءِ و اوفتے خاص وڑ اٹ اسلامی خطاطی تون کڑمب تعلقداری ارے۔ او تعلقدار کمامدار آتے پارت کرے کہ جہانی خطاطی نمائش نا اڈ تننگ کن داسہ ئی آن بست وبند آتا بناءِ کننگے و اودے اِرا یا مسہ دے اٹ بھلا جہانی ایونٹ نا دروشم تننگے تانکہ مچ آ دنیا غان ازمکار آک کوئٹہ غا برسا تینا ازم انا درشانی ءِ کننگ کیر۔ وزیراعلیٰ پارے کہ بروک آ سال مئی ٹی اڈ تروک دا نمائش نا سرحال “بنیان المرصوص” مریک و اودے 9 و 10 مئی آ اڈ تننگک، انتئے کہ دا ہمو دے ءِ ہراتم پاکستان اسہ بھلو سرسہبی اس دوئی کرے۔ او پارے کہ تدوک آ سال ہم بلوچستان اٹی جتا جتا دود آتا بست و بند کننگاسس، وخت اس کہ دا سال معرکہ حق نا دود آتیٹی خطاطی ءِ ہم اوار کننگک۔ میر سرفراز بگٹی پارے کہ پاکستان نا جہانی کہول آ شرف اٹی ودکی مننگ اٹی ءِ و زوت آتیٹ اسلامی دنیا، ترکی، سعودی عرب و پاکستان نا نیام اٹی دفاعی کمکاری ہم دا بدل مروک آ حالیت آتا درشانی ءِ کیک۔ او پیدوار کرے کہ دا معاہدہ ہچ ءُ بیدادی اسے کن اف بلکن تینا دفاع کن ءِ۔ وزیراعلیٰ پارے کہ بلوچستان اٹی بیدادی نا کمک اٹ تینا مسخت آتے دوئی کننگ نا کوشست کروک آ اسہ چنکو تپہ اس بلوچ الس ءِ اسہ دوئی مفروک جنگ اسے ٹی دھکہ تننگ اٹی ءِ ہرانا نسخان پین کس ءِ آخا بلکن تینٹ بلوچ الس ءِ مریک۔ او پارے کہ پول و انفراسٹرکچر بھس کننگ آن بلوچ الس زہمی مریک‘ وخت اس کہ واپاری ءِ توننگ و پوریاگر آتا ٹرک آتے نسخان رسیفنگ آن ہم الس نا روزگار زہمی مریک۔ او پارے کہ پاکستان نا فتحِ مبین نا کسر ءِ دنیا نا ہچ ءُ واکدار اس توننگ کپک و قوم ہرا جوزہ و سیوت نشان تسنے او گمر کڑزک۔