بلوچستان نا شونداری ٹی وزیر اعلیٰ نا عملی کڑد ستا کڑزک، چیئرمین سینیٹ

کوئٹہ (خ ن) چیئرمین سینٹ محمد صادق سنجرانی تدوک آ دے سربر آن پُر ءُ دے اس گدریفے۔ و اوڑتون سیاسی سرکڑدہ، السی نمائندہ و زند انا بشخ آتتون تعلقدار بندغ آک اوڑدہی کریر۔ دا وخت آ ہیت و گپ کرسا چیئرمین سینٹ پارے کہ ساڑی بنجائی و صوبائی حکومت آک بلوچستان نا حقی شونداری کن اواری اٹ کاریم کننگ اٹی ءُ۔ و بنجائی پی ایس ڈی پی ٹی صوبہ نا مواصلات و ایول بشخ آتا اہم انگا ڈٹ آک اوار کننگانو۔ ہرافتا پوروی آن اسہ پوسکن ءُ دور اسے نا بنا مریک۔ او پارے کہ چاغی نہادی قدرتی وسیلہ غاتیان شُپ ءُ ضلع اسے۔ ہرافتا شونداری و اوفتے ملک و صوبہ نا زرگزرانی سوگوی کن کاریم اٹ اتنگ نا بابت جامع حکمت عملی اس ٹہیفنگانے۔ او بلوچستان نا جم شونداری کن وزیراعلیٰ جام کمال خان نا وژن و عملی گام گیج آتا ستا ءِ کرے۔